Një kopsht zoologjik në Danimarkë i ka kërkuar publikut të dhurojë kafshët shtëpiake të shëndetshme që nuk i duan më në një përpjekje për të siguruar ushqim për grabitqarët.
Kopshti Zoologjik Aalborg ka kërkuar donacione të pulave të gjalla, lepujve dhe derrave guinea, për të cilat thotë se u kryhet “eutanazi e lehtë” nga një staf i trajnuar. Kopshti pranon edhe kuaj dhe pronarët e tyre kanë mundësi të përfitojnë nga shkurtimi i taksave, raporton BBC.
Në një postim në Instagram, kopshti zoologjik thotë se ka “përgjegjësi për të imituar zinxhirin natyror ushqimor të kafshëve” dhe gjallesat e vogla “përbëjnë një pjesë të rëndësishme të dietës së grabitqarëve tanë”.
Më tej thuhet se ushqimi i siguruar në këtë mënyrë “përngjan me atë që do të gjuante në jetën e egër” dhe kjo është e vërtetë për rrëqebullin euroaziatik.
Grabitqarë të tjerë që gjenden në kopsht janë luanët dhe tigrat.
Kafshët e vogla mund të dhurohen gjatë ditëve të javës jo më shumë se katër të tilla nëse nuk është caktuar një takim
Në faqen e internetit, poshtë fotos së një tigri duke ngrënë një copë mishi, renditen kushtet për dhurimin e kuajve.
Ata duhet të kenë një pasaportë dhe të mos kenë marrë mjekime për sëmundje gjatë 30 ditëve të mëparshme. Nëse dorëzimi kryhet me sukses, pronarët e kuajve përfitojnë ulje të taksave.
Në një deklaratë, drejtuesja e kopshtit zoologjik shpjegoi se kafshëve mishngrënëse u janë dhënë kafshë më të vogla “për shumë vite”.
“Kur kujdesesh për mishngrënësit, është e nevojshme t’u japësh ushqim, mundësisht me gëzof, kocka etj që dieta e tyre të jetë sa më natyrale të jetë e mundur”, shpjegoi ajo duke shtuar se “në Danimarkë, kjo praktikë është e zakonshme”.
