Kabineti i sigurisë i Izraelit ka miratuar një plan për të marrë kontrollin e qytetit të Gazës, bën të ditur zyra e kryeministrit Benjamin Netanyahu.
Netanyahu më herët kishte deklaruar se synonte të merrte nën kontroll të gjithë Rripin e Gazës – por plani i miratuar fokusohet konkretisht në qytetin e Gazës, qyteti më i madh i enklavës.
Marrja nën kontroll e qytetit të Gazës ka gjasa të jetë faza e parë e një pushtimi të plotë të Gazës, sipas korrespondentit tonë për Lindjen e Mesme.
Më herët, OKB-ja paralajmëroi se zgjerimi i operacioneve ushtarake nga Izraeli rrezikon të sjellë “pasoja katastrofike” për civilët palestinezë dhe pengjet izraelite.
Izraeli nisi luftën në Gaza pas sulmit të Hamasit më 7 tetor 2023, gjatë të cilit u vranë rreth 1,200 njerëz dhe u morën 251 pengje që u dërguan në Gaza.
Sulmi i madh ushtarak i Izraelit ka vrarë të paktën 61,158 palestinezë deri më tani, sipas ministrisë së shëndetësisë së Gazës, e cila kontrollohet nga Hamasi.
Qeveria izraelite nuk lejon organizatat ndërkombëtare të lajmeve, përfshirë BBC-në, të hyjnë lirshëm në Gaza për të raportuar.
