Një juri federale në Kaliforni ka vendosur se miliarderi i teknologjisë Elon Musk ka mashtruar aksionerët e Twitter, duke ndikuar në rënien e çmimit të aksioneve ndërsa po përgatitej të blinte kompaninë në një marrëveshje prej 44 miliardë dollarësh.
Vendimi u dha të premten në një gjykatë federale në San Francisco, pas një gjyqi trejavor. Juria arriti në përfundimin se dy postime të Musk në maj 2022 përmbanin deklarata të rreme që kontribuan në rënien e vlerës së aksioneve të Twitter-it.
Padia ishte ngritur nga investitori Giuseppe Pampena në emër të aksionerëve që kishin shitur aksionet e Twitter-it midis mesit të majit dhe fillimit të tetorit 2022.
Sipas avokatëve të paditësve, dëmet e shkaktuara mund të arrijnë rreth 2.6 miliardë dollarë. Megjithatë, juria me nëntë anëtarë vendosi se Musk nuk kishte organizuar një skemë të qëllimshme mashtrimi ndaj investitorëve.
Menjëherë pas vendimit, avokatët e Musk njoftuan se ai do ta apelojë vendimin, duke e cilësuar atë si një “pengesë të përkohshme”.
Musk bleu platformën në tetor 2022 dhe më vonë e riemërtoi atë në X. Së fundmi ai e ka integruar platformën me kompaninë e inteligjencës artificiale xAI dhe firmën e tij të eksplorimit hapësinor SpaceX.
Sipas Forbes, pasuria e Musk vlerësohet rreth 839 miliardë dollarë, kryesisht nga aksionet e tij në kompani si Tesla dhe SpaceX.
