Presidenti i SHBA, Donald Trump ka zhvilluar një konferencë të jashtëzakonshme për shtyp lidhur me operacionin ushtarak të kryer në Venezuelë dhe kapjen e presidentit Nicolas Maduro dhe bashkëshortes së tij. Ai e cilësoi aksionin si “një gjë të mrekullueshme”, duke theksuar se asnjë trup i përfshirë nuk u dëmtua dhe asnjë pajisje ushtarake nuk humbi.
Trump deklaroi se Maduro dhe bashkëshortja e tij do të përballen me akuzat amerikane për narkoterrorizëm dhe trafik droge. Sipas tij, presidenti venezuelian ndodhet tashmë në një anije në drejtim të Nju Jorkut, ku pritet të gjykohet në territorin amerikan.
“Ne do ta drejtojmë vendin deri në kohën kur të mund të bëjmë një tranzicion të sigurt, të duhur dhe të mençur,” tha Trump, duke shtuar se Shtetet e Bashkuara janë të përgatitura edhe për një valë të dytë sulmesh, nëse situata e kërkon. “Ne mendojmë se një valë e dytë mund të jetë e nevojshme, por për momentin ndoshta nuk ka më nevojë. Megjithatë, jemi plotësisht të përgatitur,” theksoi ai.
Presidenti amerikan deklaroi se SHBA-të do ta drejtojnë Venezuelën derisa të ndodhë një tranzicion i sigurt i pushtetit.
“Pra, nuk duam të përfshihemi në ndërhyrjen e dikujt tjetër. Dhe kemi të njëjtën situatë që kemi pasur për periudhën e gjatë të viteve të fundit. Pra, ne do ta drejtojmë vendin deri në kohën kur të mund të bëjmë një tranzicion të sigurt, të duhur dhe të mençur”, theksoi Trump.
Presidenti amerikan gjithashtu bëri të qartë se bashkëpunimi i ardhshëm mes Venezuelës dhe SHBA-ve do ta kthente vendin në një shtet më të pasur, më të pavarur dhe më të sigurt, duke sjellë përfitime edhe për komunitetin venezuelian që jeton në Shtetet e Bashkuara. “Ata kanë vuajtur shumë, u është marrë gjithçka. Kjo nuk do të ndodhë më,” u shpreh Trump.
Ai e cilësoi Nicolas Maduron si “diktator” dhe e akuzoi atë për udhëheqjen e një organizate të përfshirë në trafikimin e drogave të forta drejt SHBA-ve. Trump pretendoi se Maduro kishte bashkëpunuar drejtpërdrejt me kartelin Cartel de los Soles, të cilin e fajësoi për përhapjen e drogës dhe për vdekjen e mijëra amerikanëve.
Gjatë konferencës, presidenti amerikan listoi ato që ai i konsideroi gabime të Maduros.
“Maduro nuk do të jetë më kurrë në gjendje të kërcënojë një qytetar amerikan apo ndonjë person nga Venezuela. Nuk do të ketë më kërcënime.”
Ai akuzoi gjithashtu qeverinë venezueliane për “zbrazjen e burgjeve dhe dërgimin e përbindëshave të saj më të këqij dhe më të dhunshëm në SHBA për të vjedhur jetët e amerikanëve”.
“Ata ishin trafikantë droge. Ata ishin bosë të drogës. Ata i dërgonin të gjithë keqbërësit në Shtetet e Bashkuara, por jo më.”
Presidenti amerikan pretendoi gjithashtu se Venezuela kishte vjedhur naftën amerikane dhe se bizneset amerikane kishin ndihmuar në ndërtimin e industrisë së naftës së vendit. Ai e sqaroi këtë veprim të SHBA-së edhe nga perspektiva ideologjike.
“Të gjitha këto veprime ishin në shkelje të rëndë të parimeve thelbësore të politikës së jashtme amerikane që datojnë më shumë se dy shekuj më parë… që nga Doktrina Monroe. Ne e harruam pak a shumë. Ishte shumë e rëndësishme, por e harruam.”
Duke folur për strategjinë e sigurisë kombëtare, Trump theksoi se dominimi amerikan në Hemisferën Perëndimore nuk do të vihet më kurrë në dyshim dhe se SHBA po rivendos fuqinë e saj në rajon.
“Ne po e rivendosim fuqinë amerikane në një mënyrë shumë të fuqishme në rajonin tonë.”
Në përfundim, presidenti amerikan përsëriti se ky operacion synon të ndalojë çdo kërcënim nga Maduro ndaj qytetarëve amerikanë dhe venezuelianë dhe shprehu bindjen se veprimet e ndërmarra do të çojnë në një tranzicion të sigurt dhe të duhur në Venezuelë.
