Tilman Fertitta, miliarderi 68-vjeçar nga Teksasi dhe pronar i ekipit të basketbollit Houston Rockets, i cili u emërua ambasador i SHBA-së në Itali nga ish-presidenti Donald Trump në dhjetor dhe u konfirmua nga Senati në prill, nuk u vendos menjëherë në rezidencën zyrtare të ambasadorit në Romë, Villa Taverna.
Në vend të kësaj, Fertitta, një emër i njohur në industrinë e mikpritjes dhe pronar i rrjetit të restoranteve dhe kazinove “Landry’s”, kaloi rreth tre javë e gjysmë në jahtin e tij prej 150 milionë dollarësh, “Boardwalk”, ndërsa në rezidencë po kryheshin punime rinovuese në ambientet e brendshme. Sipas një zëdhënësi të kompanisë së tij, të gjitha shpenzimet për përmirësimet janë mbuluar nga vetë Fertitta dhe nuk është prekur struktura historike e vilës.
Jahti 77 metra i gjatë, i pajisur me 12 dhoma gjumi, 15 banja, një kuzhinë profesionale, gjashtë bare, një pishinë me mozaik dhe një pistë për helikopterë, shërbeu si rezidencë e përkohshme për ambasadorin. Gjatë kësaj kohe, ai raportohet se ka përdorur helikopterin për të ndjekur angazhimet zyrtare, një praktikë që ka ngjallur shqetësime në radhët e disa banorëve vendas.
Villa Taverna, një vilë e shekullit XV me kopshte të pasura dhe koleksione arti që përfshijnë periudhën nga antikiteti deri në shekullin XIX, është me qira nga Ambasada Amerikane që prej vitit 1933. Më 10 korrik, Fertitta u vendos zyrtarisht në vilë dhe pak ditë më vonë priti kryeministren italiane Giorgia Meloni në festën për nder të Ditës së Pavarësisë së SHBA-së.
Ambasadori prezantoi gjithashtu një koleksion të ri të artit amerikan në rezidencë, në bashkëpunim me programin “Art in Embassies” të Departamentit të Shtetit, duke e vënë theksin te arti si një urë komunikimi mes kulturave.
