Palestinezët në Gaza kanë zhvilluar ceremonitë mortore për pesë gazetarët e Al Jazeera-s të vrarë nga ushtria izraelite, ndërsa protesta janë mbajtur në Londër, Berlin, Tunis dhe Ramallah për të dënuar sulmin e synuar ndaj tyre. Bashkimi Evropian, Kina dhe Gjermania – aleate e ngushtë e Izraelit – kanë dënuar ngjarjen, ndërsa OKB e ka cilësuar një “shkelje të rëndë të së drejtës humanitare ndërkombëtare”.
Sulmet ajrore të Izraelit mbi Gaza vijuan edhe në orët e para të mëngjesit, duke vrarë 12 palestinezë të tjerë. Ndër viktimat është edhe një fëmijë palestinez, Mohammed Zakaria Khader, i cili humbi jetën nga kequshqyerja. Numri i të vdekurve nga uria ka arritur në 222 persona, mes tyre 101 fëmijë. Që nga fillimi i luftës, Izraeli ka vrarë të paktën 61,499 palestinezë dhe ka plagosur mbi 153,000. Nga ana tjetër, në sulmet e 7 tetorit 2023 në Izrael u vranë rreth 1,139 persona dhe mbi 200 u morën peng.
Përplasje mes ministrit të mbrojtjes dhe shefit të shtabit të ushtrisë izraelite
Sipas The Times of Israel, Ministri i Mbrojtjes, Israel Katz, ka akuzuar Shefin e Shtabit, Eyal Zamir, se ka miratuar emërime të oficerëve të lartë “pa koordinim dhe marrëveshje paraprake” me të, duke deklaruar se nuk do t’i shqyrtojë ose miratojë ato.
Ushtria izraelite reagoi duke publikuar listën e emërimeve dhe theksoi se, sipas rregulloreve, Zamir është “autoriteti i vetëm për caktimin e komandantëve me gradën kolonel e lart”. Në listë përfshihet edhe Barak Hiram, i cili do të drejtojë Divizionin e Operacioneve të ushtrisë. Hiram ka qenë figurë kontroverse pasi më 7 tetor 2023 urdhëroi goditjen me tanke dhe artileri të një shtëpie në Kibbutz Be’eri, ku mbaheshin 13 pengje izraelite. Një hetim e ka shpallur veprimin e tij “profesional” në një situatë “të vështirë dhe komplekse”.
