Izraeli ka kryer sërish sulme ajrore në pjesën jugore të Gazës, pasi ushtria e tij akuzoi Hamasin për sulme ndaj ushtarëve izraelitë. Grupi palestinez i ka cilësuar këto akuza si “të rreme dhe pa bazë”.
Sipas Agjencisë së Mbrojtjes Civile, të paktën 11 palestinezë janë vrarë në bombardimet izraelite, përfshirë edhe në një shkollë ku strehoheshin civilë të zhvendosur nga lufta.
Ndërkohë, burime diplomatike raportojnë se ndërmjetësit ndërkombëtarë po përpiqen me urgjencë të parandalojnë rifillimin e luftës në shkallë të plotë. Sipas Al Jazeera, e cila po raporton nga Ammani për shkak të ndalimit të saj në Izrael dhe Bregun Perëndimor, Tel Avivi e ka njoftuar paraprakisht Uashingtonin për sulmet, por pa kërkuar miratim.
Në orët e fundit, kryeministri Benjamin Netanyahu po zhvillon konsultime me zyrtarë të lartë të sigurisë për hapat e mëtejshëm – nëse do të vijojnë sulmet apo do të ndalen përkohësisht. Po ashtu, janë në zhvillim bisedime mes autoriteteve izraelite dhe amerikane për fazat e ardhshme të marrëveshjes, pasi ende 16 trupa të pengjeve izraelite ndodhen në Gaza.
Që nga fillimi i konfliktit dy vjet më parë, pothuajse 70 mijë palestinezë janë vrarë, shumica civilë, ndërsa rreziku për rikthimin e luftës mbetet i lartë, pavarësisht përpjekjeve diplomatike për ta shmangur atë.
