Forcat Ajrore të Izraelit kanë ndërmarrë një sulm në Rripin e Gazës, konkretisht në zonën e Rafahut, pas pretendimeve se Hamasi ka shkelur marrëveshjen e armëpushimit, raporton The Times of Israel.
Sipas ushtrisë izraelite (IDF), militantë të Hamasit kanë kryer sulme ndaj trupave izraelite duke përdorur granatahedhës dhe zjarr snajperi, në një akt që ata e cilësojnë si "shkelje të guximshme" të armëpushimit.
Nga ana tjetër, një zyrtar i lartë i Hamasit ka mohuar akuzat, duke theksuar se grupi mbetet i përkushtuar ndaj marrëveshjes.
Të premten, IDF raportoi për një incident ku persona të armatosur hapën zjarr ndaj ushtarëve izraelitë në Rafah, por pa shkaktuar viktima. Më vonë, ushtria deklaroi se kishte goditur një tjetër grup të armatosur pranë Khan Younisit, duke shtuar se do të vijojë të veprojë për të “neutralizuar çdo kërcënim të menjëhershëm”.
