Izraeli ka ndërmarrë atë që e ka cilësuar si një “sulm parandalues” ndaj Iranit, duke përshkallëzuar ndjeshëm tensionet në rajon. Në një deklaratë të bërë paraditen e sotme, ministri izraelit i Mbrojtjes, Israel Katz, shpalli një “gjendje të veçantë dhe të përhershme emergjence” në të gjithë territorin e vendit, si masë paraprake përballë një reagimi të mundshëm nga Teherani.
Paralelisht, mediat iraniane raportuan për disa shpërthime në kryeqytetin Teheran, ku sipas pamjeve të publikuara janë vërejtur re të dendura tymi në zona të ndryshme të qytetit. Deri në këto momente, autoritetet iraniane nuk kanë dhënë një njoftim zyrtar mbi natyrën apo shkakun e shpërthimeve.
Në Izrael, sirenat e alarmit janë aktivizuar në disa rajone, ndërsa qytetarët janë orientuar drejt strehimoreve si masë mbrojtëse nga një sulm i mundshëm me raketa. Forcat e Mbrojtjes së Izraelit (IDF) konfirmuan se operacioni është ndërmarrë në kuadër të një strategjie parandaluese, duke u bërë thirrje qytetarëve të jenë të përgatitur për mundësinë e një reagimi nga Irani.
Sipas raportimit të The Jerusalem Post, në një njoftim kombëtar IDF theksoi se paralajmërimi synon përgatitjen e publikut për mundësinë e lëshimit të raketave drejt territorit izraelit.
Situata mbetet dinamike, ndërsa komuniteti ndërkombëtar po e ndjek me shqetësim zhvillimin e fundit të tensioneve mes dy vendeve.
