Izraeli goditi me intensitet të lartë Bejrutin të premten, pasi urdhëroi një evakuim të paprecedentë të gjithë periferisë jugore të kryeqytetit libanez, duke shënuar një zgjerim të madh të luftës kundër Iranit që nisi një javë më parë së bashku me Shtetet e Bashkuara.
Në të njëjtën kohë, Izraeli ndërmori një valë të re sulmesh edhe ndaj Iranit. Ushtria izraelite deklaroi se rreth 50 avionë luftarakë goditën një bunker nën kompleksin në Teheran që i përkiste liderit suprem të vrarë Ali Khamenei, i cili sipas tyre vazhdonte të përdorej nga drejtuesit iranianë edhe pas vrasjes së tij në ditën e parë të luftës.
Ndërkohë, në një nga sinjalet e para që mund të tregojnë përpjekje diplomatike për të ndalur konfliktin, presidenti i Iranit Masoud Pezeshkian deklaroi se disa vende kanë nisur përpjekje ndërmjetësimi.
“Në disa vende kanë filluar përpjekje ndërmjetësimi”, shkroi ai në rrjetin social X, pa dhënë detaje se cilat shtete janë të përfshira.
Ai shtoi se Irani është i përkushtuar për paqe të qëndrueshme në rajon, por nuk do të hezitojë të mbrojë sovranitetin dhe dinjitetin e vendit.
Në sistemin politik iranian presidenti është nën autoritetin e liderit suprem, por aktualisht Pezeshkian është pjesë e një paneli që ka marrë përkohësisht funksionet e Khameneit.
Ndërkohë, presidenti amerikan Donald Trump ka shkuar më tej në deklaratat e tij, duke kërkuar që Shtetet e Bashkuara të kenë rol në përzgjedhjen e pasardhësit të liderit suprem iranian.
Izraeli zgjeron bombardimet në Liban
Izraeli ka zgjeruar sulmet edhe në Liban, me synimin për të goditur Hezbollahun, milicinë shiite të lidhur me Iranin dhe një nga forcat më të fuqishme politike dhe ushtarake në vend që prej viteve 1980.
Hezbollahu kishte lëshuar këtë javë raketa drejt Izraelit, duke deklaruar se ishte një akt hakmarrjeje për vrasjen e Khameneit.
Shpërthime të shumta ndriçuan qiellin e natës mbi periferinë jugore të Bejrutit. Ushtria izraelite tha se kishte kryer 26 valë bombardimesh gjatë natës, duke goditur qendra komanduese të Hezbollahut dhe depo armësh.
Banorët e zonës tregojnë për një situatë kaotike dhe një eksod të detyruar nga lagjet e tyre.
“Po flemë në rrugë – disa në makina, disa në trotuar, disa në plazh”, tha Jamal Seifeddin, 43 vjeç, i cili u largua nga periferia jugore e Bejrutit dhe kaloi natën në qendër të qytetit.
“Nuk kam fjetur kurrë në tokë si kështu. U detyrova. Askush nuk solli as një batanije.”
Evakuim masiv në Bejrut
Izraeli urdhëroi banorët të largohen nga e gjithë zona jugore e Bejrutit, ku jetojnë qindra mijëra njerëz.
Në operacionet e mëparshme ushtarake, ushtria izraelite kishte kërkuar vetëm evakuime të kufizuara në disa lagje specifike. Këtë herë urdhri përfshin gjithë periferinë jugore të kryeqytetit, një zonë që konsiderohet bastion i Hezbollahut.
Izraeli ka ndërhyrë disa herë në Liban gjatë dekadave të fundit. Fushata e fundit ushtarake në vitin 2024 dobësoi ndjeshëm Hezbollahun, por intensiteti i bombardimeve të fundit në Bejrut konsiderohet nga analistët si një nga episodet më të rënda në historinë e konfliktit në kryeqytetin libanez.
