Italia nuk është në luftë dhe nuk ka ndërmend të hyjë në konflikt. Ky ishte mesazhi i dalë nga mbledhja e Këshillit Suprem të Mbrojtjes, i drejtuar nga Presidenti Sergio Mattarella, ku u riafirmua linja e shprehur më parë në Parlament nga kryeministrja Giorgia Meloni.
Duke iu referuar nenit 11 të Kushtetutës, i cili refuzon luftën si mjet për zgjidhjen e mosmarrëveshjeve ndërkombëtare, Italia theksoi se është e angazhuar të mbështesë çdo përpjekje që rikthen në plan të parë rrugën negociuese dhe diplomatike.
Këshilli shprehu gjithashtu shqetësim të madh për luftën në Iran dhe për efektet destabilizuese që mund të shkaktojë në rajon, përfshirë rrezikun e kërcënimeve hibride dhe veprimeve të organizatave terroriste.
Në deklaratë u theksua edhe frika për përhapjen e konflikteve, veçanërisht në zonën e Mesdheut dhe në Lindjen e Mesme, ku Italia ka interesa strategjike të rëndësishme.
Autoritetet italiane i kërkuan gjithashtu Izraelit të shmangë reagimet disproporcionale ndaj veprimeve të Hezbollahut, të cilat u cilësuan gjithsesi si të papranueshme. Ndërkohë, u konsideruan “të papranueshme” edhe sulmet izraelite ndaj kontingjentit të UNIFIL-it, aktualisht nën komandën italiane.
Në deklaratë u dënua edhe sulmi ndaj ushtarëve italianë në Erbil, Irak, i cili çoi në një tërheqje të pjesshme të kontingjentit italian nga zona.
Mbledhja e Këshillit Suprem të Mbrojtjes zgjati rreth dy orë e gjysmë dhe morën pjesë, përveç presidentit Mattarella, edhe kryeministrja Giorgia Meloni, ministrat Antonio Tajani, Guido Crosetto, Matteo Piantedosi, Giancarlo Giorgetti, Adolfo Urso, nënsekretari Alfredo Mantovano, si dhe shefi i Shtabit të Përgjithshëm të Mbrojtjes, gjenerali Luciano Portolano.
