Në Itali, kontrollet për alkool dhe drogë në vendin e punës do të mund të kryhen edhe në mënyrë të menjëhershme gjatë orarit të punës, nëse ekziston një dyshim i arsyeshëm për përdorim nga ana e punonjësve në aktivitete me rrezik të lartë.
Kjo parashikohet në një qarkore të publikuar nga Inspektorati Kombëtar i Punës, në zbatim të nenit 17 të dekretit të sigurisë (DL 159/2025), i cili është kthyer tashmë në ligj.
Deri më tani, kontrollet anti-alkool dhe anti-drogë kryheshin vetëm periodikisht ose pas një incidenti. Me ndryshimet e reja, testet mund të realizohen në çdo moment gjatë punës, por vetëm për aktivitete që konsiderohen me rrezik dhe nga mjeku kompetent.
Megjithatë, zbatimi i plotë i masës do të nisë vetëm pas përfundimit të Marrëveshjes Shtet-Rajone, e cila do të përcaktojë në detaje kushtet dhe mënyrat e verifikimit të varësisë nga alkooli dhe droga.
Ndërkohë, për të rritur disponueshmërinë e mjekëve kompetentë, parashikohet që organizmat e përbashkët të ndërmarrjeve të vogla (deri në 10 punonjës) të mund të lidhin marrëveshje me autoritetet shëndetësore lokale ose me mjekë të autorizuar për të përmbushur detyrimet e mbikëqyrjes shëndetësore.
Objektivi i kontrolleve është parandalimi i aksidenteve në punë, duke shmangur situatat kur punonjësit nuk janë në gjendje të plotë për të kontrolluar veprimet e tyre.
Qarkorja sjell edhe risi të tjera në fushën e sigurisë në punë. Futet detyrimi për “badge ndërtimi”, i cili do të ketë edhe format digjital me kod unik kundër falsifikimit. Mosrespektimi i këtij detyrimi do të ndëshkohet me gjobë nga 100 deri në 500 euro për çdo punonjës.
Po ashtu, parashikohet heqja e 5 pikëve nga “patenta me pikë” e kompanive për çdo punonjës të padeklaruar (“në të zezë”), pavarësisht nga numri i ditëve të punës së parregullt.
Masat e reja synojnë forcimin e sigurisë në vendin e punës dhe luftën kundër punës informale në Itali.
