Tyler Robinson, i dyshuari për vrasjen e aktivistit konservator Charlie Kirk, ka pranuar krimin në një bisedë online, vetëm pak para se të dorëzohej tek autoritetet, raportojnë mediat amerikane. Robinson, i cili u arrestua të enjten vonë pas një kërkimi intensiv prej 33 orësh, ishte pjesë e një grupi të vogël miqsh në platformën Discord kur shkroi: “Hej të gjithëve, kam lajme të këqija për ju. Ishte unë në UVU dje. Më vjen keq për gjithçka.” Ai po mbahet në paraburgim në Utah, ku akuzohet për vrasje të rëndë dhe pritet të dalë para gjykatës të martën. Autoritetet kanë lënë të hapur mundësinë e ngritjes së akuzës për vrasje kapitale, e cila në Utah mund të sjellë edhe dënimin me pushkatim.
Si ndodhi ngjarja
Hetuesit zbuluan se Robinson kishte përdorur një snajper për të qëlluar Kirk me një plumb në qafë, teksa ky i fundit mbante një fjalim në kampusin e Utah Valley University (UVU). Ai ishte fshehur mbi një çati afër vendngjarjes dhe u identifikua përmes ADN-së së gjetur në armë dhe në një shufër të braktisur në çatinë ku qëndronte. FBI konfirmoi gjithashtu se Robinson kishte lënë një shënim paraprak ku shkruante se do të vepronte kundër Kirk.
Sipas raportimeve, Robinson vinte nga një familje republikane në St. George, një qytet konservator rreth katër orë larg Orem. Ai ishte në vitin e tretë të një stazhi si elektricist. Në rrjetet sociale, 22-vjeçari shfaqej me armë dhe në një rast kishte pozuar për Halloween mbi shpatullat e një figure që simbolizonte Donald Trump. Hetuesit theksojnë se ai ushqente urrejtje të thellë ndaj Kirk dhe ishte ndikuar nga ideologji të majta ekstreme, duke u radikalizuar shpejt në vitet e fundit. Robinson jetonte me një partner transgender, i cili sipas autoriteteve nuk ka asnjë lidhje me krimin dhe po bashkëpunon me hetimin.
Guvernatori i Utah, Spencer Cox, deklaroi se Robinson kishte kaluar shumë kohë në “cepave të errët të internetit” dhe se radikalizimi i tij ishte përshpejtuar nga ekspozimi ndaj përmbajtjeve ekstremiste. Në fishekët e gjetur, autoritetet zbuluan shënime me mesazhe si: “Hej, fashist! Kap!” dhe “Bella ciao”, një këngë antifashiste e Luftës së Dytë Botërore, e përdorur në komunitete të caktuara online. Platforma Discord ka konfirmuar bashkëpunimin me autoritetet, por një hetim i brendshëm i kompanisë nuk gjeti prova që Robinson kishte planifikuar apo promovuar dhunë përmes rrjetit social.
Ngjarja ka tronditur opinionin publik në SHBA. Në mbarë vendin po zhvillohen homazhe dhe vigjile për Charlie Kirk. Mijëra persona kanë marrë pjesë në aktivitete përkujtimore, përfshirë edhe një ceremoni të madhe në Kennedy Center në Washington. Charlie Kirk ishte themelues i organizatës konservatore Turning Point USA, e cila kishte ndikim të madh tek të rinjtë përmes aktiviteteve në terren, mediave sociale dhe prezencës së tij të shpeshtë në televizion.
Hetimet e FBI-së dhe autoriteteve lokale për motivet dhe lidhjet e Robinson vijojnë, ndërsa procesi gjyqësor pritet të tërheqë vëmendjen kombëtare dhe ndërkombëtare.
