Ish-presidenti francez Nicolas Sarkozy është dënuar me pesë vite burg pasi u shpall fajtor për komplot kriminal, në një çështje që lidhet me miliona euro financime të paligjshme nga ish-udhëheqësi libian, Muammar Gaddafi. Gjykata e Parisit e shpalli të pafajshëm për akuzat e tjera, përfshirë korrupsionin pasiv dhe financimin e paligjshëm të fushatës. Megjithatë, vendimi parashikon që ai të vuajë dënimin edhe nëse e apelon, gjë që Sarkozy ka thënë se do ta bëjë.
Duke folur pas seancës së së enjtes, 70-vjeçari, president nga viti 2007 deri në 2012, e quajti vendimin “jashtëzakonisht serioz për shtetin e së drejtës”. Ai, i cili prej kohësh pretendon se çështja është e motivuar politikisht, akuzohej se kishte përdorur fondet e Gaddafit për të financuar fushatën presidenciale të vitit 2007. Prokuroria pretendoi se në këmbim Sarkozy i kishte premtuar Gaddafit ndihmë për të përmirësuar imazhin e tij ndërkombëtar, por gjykata vlerësoi se nuk kishte prova të mjaftueshme për të vërtetuar që fondet ishin përdorur nga ai personalisht.
Përveç burgut, Sarkozy u gjobit edhe me 100 mijë euro. Vendimi shkaktoi habi në sallën e gjyqit dhe përbën një goditje të rëndë për ish-presidentin, i cili gjithmonë ka pohuar pafajësinë e tij. “Nëse duan patjetër të fle në burg, do të fle, por me kokën lart,” deklaroi ai para mediave.
Hetimet nisën në vitin 2013, pasi djali i Gaddafit, Saif al-Islam, e akuzoi Sarkozy-n për marrje të miliona eurove nga regjimi i të atit. Më pas, një biznesmen libanez, Ziad Takieddine, pretendoi se kishte prova të shkruara për financimin e fushatës me 50 milionë euro. Në këtë proces u gjykuan edhe ish-ministrat e brendshëm Claude Gueant dhe Brice Hortefeux: i pari u shpall fajtor për korrupsion, ndërsa i dyti për komplot kriminal.
Edhe bashkëshortja e Sarkozy-t, ish-modelja dhe këngëtarja Carla Bruni, është akuzuar për fshehje provash dhe bashkëpunim për mashtrim lidhur me këtë çështje, akuza të cilat ajo i mohon. Sarkozy ndërkohë po apelon edhe një dënim tjetër prej një viti për tejkalim të shpenzimeve në fushatën e vitit 2012, si dhe një vendim të vitit 2021, kur u shpall fajtor për tentativë korrupsioni ndaj një gjyqtari. Në atë rast, dënimin iu lejua ta vuante në shtëpi me byzylyk elektronik.
