Detaje të reja kanë dalë në dritë rreth ngjarjes së rëndë që tronditi Shtetet e Bashkuara, kur një sulm i armatosur në një kishë mormone në Michigan shkaktoi vdekjen e katër personave dhe plagosjen e të paktën tetë të tjerëve.
Autoritetet amerikane kanë identifikuar autorin e sulmit si Thomas Jacob Sanford, 40 vjeç, një ish-marins i Shteteve të Bashkuara të Amerikës dhe veteran i Luftës në Irak. Sanford kishte shërbyer në radhët e ushtrisë amerikane gjatë viteve 2004–2008. Ai u vra nga forcat e rendit në një parking jashtë kishës, menjëherë pas kryerjes së sulmit.
Sipas raportimeve zyrtare, sulmi ndodhi paraditen e së dielës me orën lokale. Sanford u fut me makinë brenda ambientit të kishës, duke shkaktuar panik mes besimtarëve, dhe më pas hapi zjarr me armë. Pasi qëlloi drejt turmës, ai dyshohet se i vuri qëllimisht flakën ndërtesës, duke shkaktuar një zjarr masiv që shembi pjesërisht strukturën e kishës.
Ekipet e shpëtimit po vijojnë ende kërkimet në rrënoja, pasi dyshohet për viktima të tjera të mundshme.
Pas neutralizimit të autorit, policia kreu kontrolle në makinën e tij dhe gjeti pajisje të improvizuara shpërthyese, duke rritur edhe më shumë shqetësimet për qëllimet e tij. Po ashtu, forcat e sigurisë bastisën banesën e Sanford për të mbledhur prova të tjera dhe për të zbardhur motivet e sulmit, të cilat deri më tani mbeten të paqarta.
Presidenti amerikan Donald Trump reagoi menjëherë pas ngjarjes, duke e dënuar ashpër aktin e dhunshëm dhe duke shprehur ngushëllime për familjarët e viktimave. Ai theksoi se “epidemia e dhunës në vend duhet të marrë fund”, duke e cilësuar këtë sulm si një tragjedi që nuk duhet të përsëritet.
Ky nuk ishte akti i vetëm i dhunës që tronditi Amerikën gjatë fundjavës. Vetëm një ditë më parë, të shtunën në mbrëmje, tre persona humbën jetën dhe të paktën tetë të tjerë u plagosën në një tjetër sulm, pasi një individ hapi zjarr nga një anije ndaj një turme të mbledhur pranë një bari buzë ujit në një qytet bregdetar të Karolinës së Veriut.
Ngjarjet e njëpasnjëshme kanë shtuar shqetësimet për sigurinë publike në SHBA, duke vënë sërish në qendër të debatit çështjen e dhunës me armë dhe masat që duhen ndërmarrë për të parandaluar tragjedi të ngjashme në të ardhmen.
