Një sulm me raketë ka goditur Ambasadën e Shteteve të Bashkuara në Bagdad, sipas një zyrtari të lartë të sigurisë irakiane. Një gazetar i agjencisë AFP (France Presse) raportoi se mbi kompleksin diplomatik në qendër të kryeqytetit irakian u pa të ngrihej tym i zi pas shpërthimit.
Ky është sulmi i dytë ndaj Ambasadës amerikane në Bagdad që prej nisjes së përshkallëzimit të konfliktit mes SHBA-Izraelit dhe Iranit. Sipas raportimit të Associated Press, një raketë goditi një platformë për uljen e helikopterëve brenda kompleksit diplomatik, ndërsa AFP citon burime sipas të cilave objekti mund të jetë goditur nga një dron.
Sulmi ndodhi pak pasi dy luftëtarë të mbështetur nga Irani u vranë në sulme ajrore në kryeqytetin irakian, raportoi AFP, duke cituar disa burime. Njëri prej tyre besohet të ketë qenë një figurë e rëndësishme në rrjetin e grupeve të lidhura me Teheranin.
Ndërkohë, disa grupe të armatosura pro-iraniane, të bashkuara nën ombrellën e Lëvizjes Islamike të Rezistencës në Irak, kanë marrë përgjegjësinë për sulmet e vazhdueshme me raketa dhe dronë kundër bazave amerikane në rajon. Këto sulme janë intensifikuar në sfondin e tensioneve në rritje në Lindjen e Mesme.
