Irani ka deklaruar se anijet që nuk janë “armiqësore” mund të kalojnë përmes ngushticës së Hormuzit, ndërsa trafiku detar në këtë rrugë jetike është ulur ndjeshëm, duke nxitur një nga krizat më të mëdha globale të energjisë në dekada.
Në një deklaratë të publikuar të martën, misioni iranian në Kombet e Bashkuara tha se anijeve do t’u lejohet “kalim i sigurt” përmes kësaj ngushtice, me kusht që ato të mos marrin pjesë dhe të mos mbështesin veprime agresive kundër Iranit, si dhe të respektojnë plotësisht rregullat e shpallura të sigurisë.
Sipas deklaratës, anijet do të mund të kalojnë vetëm në koordinim me autoritetet kompetente iraniane. Një mesazh i ngjashëm është dërguar edhe tek Organizata Ndërkombëtare Detare (IMO), agjencia e OKB-së që merret me sigurinë e transportit detar ndërkombëtar.
Megjithatë, Teherani nuk ka dhënë detaje se cilat rregulla duhet të ndjekin anijet për të kaluar në mënyrë të sigurt në këtë korridor detar, përmes të cilit zakonisht kalon rreth një e pesta e furnizimit global me naftë dhe gaz natyror të lëngshëm.
Deklarata e Iranit vjen në një kohë kur presidenti amerikan Donald Trump ka thënë se janë duke u zhvilluar negociata për t’i dhënë fund luftës SHBA-Izrael kundër Iranit, megjithëse Teherani ka mohuar më parë se ekzistojnë bisedime të tilla.
Ndërkohë, trafiku në ngushticën e Hormuzit mbetet shumë më i ulët se normalja. Sipas firmës së inteligjencës detare Windward, vetëm pesë anije kaluan të hënën në këtë rrugë detare, krahasuar me mesatarisht rreth 120 kalime në ditë para fillimit të konfliktit më 28 shkurt.
