18 janar (Reuters) – Të paktën 5,000 persona janë vrarë gjatë protestave mbarëkombëtare në Iran, përfshirë rreth 500 anëtarë të forcave të sigurisë, deklaroi të dielën një zyrtar iranian, duke iu referuar shifrave të verifikuara dhe duke akuzuar “terroristë dhe rebelë të armatosur” për vrasjen e “iranianëve të pafajshëm”.
Protestat shpërthyen më 28 dhjetor për shkak të vështirësive ekonomike dhe, brenda dy javësh, u shndërruan në demonstrata masive që kërkonin fundin e sundimit klerikal. Sipas Reuters, kjo është vala më vdekjeprurëse e trazirave që nga Revolucioni Islamik i vitit 1979.
Presidenti amerikan Donald Trump ka kërcënuar në mënyrë të përsëritur me ndërhyrje, nëse protestuesit vazhdojnë të vriten ose të ekzekutohen. Të premten, ai deklaroi në rrjete sociale se autoritetet iraniane kishin anuluar ekzekutimet masive të planifikuara. Megjithatë, të dielën, gjyqësori iranian la të hapur mundësinë që ekzekutimet të vazhdojnë.
Udhëheqësi suprem Ali Khamenei deklaroi se Irani “nuk do ta fusë vendin në luftë”, por paralajmëroi se “kriminelët e brendshëm dhe të jashtëm nuk do të mbeten të pandëshkuar”, ndërsa akuzoi SHBA-në dhe Izraelin për organizimin e dhunës, duke pranuar se ka pasur “disa mijëra viktima”.
Zëdhënësi i gjyqësorit iranian, Asghar Jahangir, tha se disa veprime janë cilësuar si “Mohareb” – term juridik islam që nënkupton “luftë kundër Zotit” dhe që, sipas ligjit iranian, dënohet me vdekje.
Ndërkohë, organizata amerikane e të drejtave të njeriut HRANA raportoi se numri i viktimave ka arritur 3,308, me mijëra raste ende nën verifikim, si dhe mbi 24,000 arrestime. Zyrtarët iranianë pretendojnë se bilanci përfundimtar i viktimave nuk pritet të rritet ndjeshëm.
Sipas Reuters, përplasjet më të ashpra dhe numri më i lartë i viktimave janë regjistruar në zonat kurde në veriperëndim të Iranit, ndërsa autoritetet raportojnë për tentativa të grupeve separatiste të armatosura për të hyrë në vend nga Iraku.
Protestat duket se janë zbehur pas një goditjeje të ashpër nga autoritetet, ndërsa ndërprerjet e internetit kanë vështirësuar verifikimin e informacionit në terren.
