Presidenti amerikan Donald Trump, ka deklaruar se është gati të kalojë në një fazë të dytë të sanksioneve ndaj Rusisë, vetëm disa orë pasi Moska kreu sulmin më të madh ajror në Ukrainë që nga fillimi i luftës.
Sipas mediave ndërkombëtare, të paktën katër persona humbën jetën, mes tyre një nënë dhe një foshnjë tre muajshe, ndërsa mbi 40 të tjerë u plagosën pas një bombardimi masiv me dronë të ushtrisë ruse gjatë natës.
Trump u pyet nga gazetarët, ndërsa ishte duke shkuar në finalen e turneut të tenisit US Open, nëse ishte gati për një raund të ri ndëshkimesh ndaj Moskës. Ai u përgjigj shkurt: “Po”.
Deklarata e tij erdhi menjëherë pas qëndrimit të Sekretarit të Thesarit të SHBA-së, Scott Bessent, i cili tha se presioni i shtuar ekonomik nga Shtetet e Bashkuara dhe Evropa mund të detyrojë presidentin rus, Vladimir Putin, të hyjë në bisedime paqeje me Ukrainën.
Ndërkohë, presidenti ukrainas Volodymyr Zelensky e ka refuzuar ftesën e Putinit për të udhëtuar në Moskë dhe për të diskutuar për paqe, duke e cilësuar atë si një përpjekje për të “shtyrë takimin” dhe për të fituar kohë. Zelensky theksoi se Putini po përpiqet të manipulojë edhe marrëdhëniet me Shtetet e Bashkuara. Nga ana tjetër, lideri i Kremlinit ka minimizuar rëndësinë e një takimi të mundshëm me Zelenskyn, por më vonë ka lënë të hapur mundësinë që ai të ndodhë, me kusht që të zhvillohet vetëm në Moskë.
