Emisari i posaçëm i presidentit amerikan Donald Trump për Lindjen e Mesme, Steve Witkoff, zhvilloi të premten një vizitë në Lindjen e Gazës, ku premtoi shtim të ndihmës humanitare për popullsinë që po përballet me urinë dhe krizën më të rëndë humanitare në historinë moderne të territorit.
“Qëllimi i kësaj vizite ishte të përpilohej një plan për furnizimin me ushqime dhe ndihma mjekësore për banorët e Gazës”, shkroi Witkoff në platformën X, duke shtuar se qëndruan për më shumë se pesë orë brenda territorit të shkatërruar nga lufta.
Vizita vjen në një moment kur presioni ndërkombëtar po rritet ndaj Izraelit dhe SHBA-së për menaxhimin e krizës në Rripin e Gazës, ku sipas Kombeve të Bashkuara rreziku i urisë së përgjithshme është më real se kurrë pas gati 22 muajsh lufte të përgjakshme që shpërtheu pas sulmit të Hamasit më 7 tetor 2023.
Në prag të vizitës së Witkoff, Human Rights Watch (HRW) denoncoi sistemin e shpërndarjes së ndihmave që drejtohet nga Izraeli dhe SHBA-të përmes Fondacionit Humanitar për Gazën (GHF), duke e cilësuar atë si një “kurth vdekjeje” për banorët palestinezë.
Sipas OKB-së, 1.373 palestinezë janë vrarë teksa prisnin në radhë për ndihmë, prej të cilëve 859 afër qendrave të GHF-së – një organizatë me financim të paqartë, që sipas Kombeve të Bashkuara mbështetet kryesisht nga ushtria izraelite.
Së bashku me Witkoff, edhe ambasadori amerikan në Izrael, Mike Huckabee, vizitoi një nga qendrat e GHF-së.
“Qëllimi ishte të mësojmë të vërtetën mbi qendrat e ndihmës humanitare dhe të kuptojmë si funksionon shpërndarja,” tha Huckabee për gazetarët.
Në një intervistë për Axios, presidenti Trump deklaroi se po përpunon një plan për të “ushqyer njerëzit” në Gaza, duke e konsideruar gjendjen si “të papranueshme” dhe duke shprehur gatishmërinë për të ndërhyrë.
Sipas raportit të fundit të mbrojtjes civile në Gaza, të paktën 22 palestinezë janë vrarë nga sulmet izraelite në 24 orët e fundit – mes tyre 8 persona që prisnin ndihma, përfshirë 2 afër qendrave të GHF-së.
GHF filloi aktivitetin e tij në fund të majit, pas tre muajsh bllokade totale të ndihmës nga Izraeli, i cili refuzoi të ndjekë sistemin e OKB-së për shpërndarjen e ndihmave.
