Ish-nënpresidentja e SHBA-ve, Kamala Harris, ka shprehur shqetësim që nuk i kërkoi Joe Biden-it të tërhiqej nga gara për Shtëpinë e Bardhë. Në një intervistë për BBC-në, ajo tha:
“Po, e kam menduar nëse duhej të kisha një bisedë me të, për t’i sugjeruar që të mos kandidonte për rizgjedhje.”
Pas muajsh të tërë spekulimesh për shëndetin dhe qartësinë mendore të presidentit, Joe Biden përfundimisht i dha fund fushatës së tij për rizgjedhje në korrik të vitit 2024 — pas një performance katastrofike në debat kundër Donald Trump, disa javë më herët.
Kamala Harris, e cila mori përsipër kandidaturën demokrate pas tërheqjes së Biden-it, por humbi ndaj Trump-it, ka zbuluar në librin e saj për fushatën tre-mujore se ajo nuk e kishte diskutuar kurrë me Presidentin Biden shqetësimin e saj për aftësitë e tij. Po ashtu, as atëherë 81-vjeçari nuk e kishte ngritur vetë këtë çështje me të.
Në librin e saj, “107 Days” (107 Ditë), ish-nënpresidentja shkruan se vendimi i Biden-it për të kandiduar sërish “nuk duhej të ishte lënë në dorën e egos apo ambicies personale të një individi”. Ajo shton se “ndoshta” duhej ta kishte ngritur këtë temë me të. Në intervistën për BBC, Harris tha se ende e mendon me vete nëse duhej të kishte vepruar ndryshe dhe ta kishte hapur këtë bisedë:
“E reflektoj ende nëse duhej të kisha një bisedë me të, për t’i kërkuar të mos kandidonte.”
Ajo shtoi se “shqetësimi im, sidomos kur e shoh tani me reflektim, është nëse duhej të kisha folur realisht.”
Më pas ajo pyeti veten: “A ishte kjo nga mirësjellja apo nga pakujdesia ime?”
Harris shpjegoi se shqetësimi i saj nuk kishte të bënte me aftësinë e Biden-it për ta kryer punën e presidentit, por me aftësinë e tij për të përballuar lodhjen e madhe fizike dhe mendore që kërkon një fushatë presidenciale, veçanërisht kur përballesh me Donald Trump. E pyetur pse bën dallim mes këtyre dy gjërave, ajo tha se:
“Ka një ndryshim serioz midis kandidimit për postin dhe ushtrimit të detyrave të presidentit. Dhe kandidimi kundër Trump është edhe më rraskapitës.”
Ajo shtoi: “Kisha një shqetësim për aftësinë e tij – për nivelin e qëndrueshmërisë dhe energjisë që kërkon, sidomos kur përballesh me presidentin aktual.”
Sipas saj, ishte e vështirë të fliste hapur, sepse nëse do ta bënte, do të rrezikonte të akuzohej për interes personal politik:
“Pjesë e problemit ishte: a do të kishte qenë një bisedë e frytshme dhe efektive, duke marrë parasysh se mund të interpretohej si një veprim në interesin tim personal?”
Çështja nëse njerëzit përreth Biden-it duhej ta kishin sfiduar më fort vendimin e tij për të kandiduar sërish është bërë tashmë një temë e debatit të gjerë publik.
Një libër i fundit, “Original Sin” nga gazetarët Jake Tapper dhe Alex Thompson, pretendon se disa persona afër presidentit e kishin fshehur përkeqësimin e tij fizik nga publiku.
Ndërkohë, ndihmësit e Biden-it i janë përgjigjur ashpër këtyre pretendimeve, duke thënë se po, kishte ndryshime fizike për shkak të moshës, por nuk kishte asnjë provë për paaftësi mendore dhe asgjë që ndikonte në aftësinë e tij për të kryer detyrat e presidentit.
Në intervistën e tij të parë pas largimit nga Shtëpia e Bardhë, në maj të këtij viti, Biden i tha BBC-së se “nuk do të kishte bërë ndonjë ndryshim edhe sikur të ishte tërhequr më herët nga gara.”
Në një pjesë tjetër të bisedës për BBC, Harris — e cila ndodhej në Britani për të promovuar librin e saj — deklaroi se është e mundur të kandidojë sërish për president.
Ajo ka përjashtuar mundësinë për të kandiduar për guvernatore të shtetit të saj, Kaliforni, por shtoi se nuk ka mbaruar ende me shërbimin publik:
“Nuk kam mbaruar ende,” – tha ish-prokurorja dhe nënpresidentja, duke lënë të hapur derën për një rikthim të mundshëm në politikën kombëtare të SHBA-së.
