Në një periudhë të vështirë politike për qeverinë konservatore dhe në vitin e 7-të të mandatit të tij, Kryeministri grek Kyriakos Mitsotakis ka prezantuar një paketë të re reformash ekonomike dhe sociale, me vlerë 1.6 miliardë euro, nga Panairi i 89-të Ndërkombëtar i Selanikut. Paketa synon të mbështesë mbi 4 milionë qytetarë grekë dhe, sipas kryeministrit, përbën “reformat më të guximshme të viteve të fundit”.
Mitsotakis tha se Greqia ka kaluar nga “kriza në stabilitet”, duke përmendur uljen e papunësisë, rritjen e investimeve dhe turizmit si dëshmi të suksesit ekonomik të qeverisë së tij. Megjithatë, ai pranoi se kostoja e jetesës vazhdon të jetë një sfidë serioze për shumë grekë dhe u zotua për mbështetje pa cënuar stabilitetin fiskal.
Masat kryesore për qytetarët
Paketa përfshin një sërë masash që prekin drejtpërdrejt buxhetet familjare:
Ulja e tatimeve: 2 pikë për të gjithë dhe ulje shtesë për familjet me fëmijë.
Tatim zero për të rinjtë deri në 25 vjeç me të ardhura deri në 20 mijë euro.
Ulje e tatimit nga 22% në 9% për qytetarët deri në moshën 30 vjeç.
Përfitimet për qytetarët nga këto masa llogariten nga 400 deri në 4100 euro në vit.
Në përpjekje për të frenuar rritjen e çmimeve të banesave, qeveria planifikon:
Ndërtimin e 2 mijë apartamenteve për qytetarë pa strehë, në ish-reparte ushtarake.
Ulje të normës së tatimit për qiratë nga 12 mijë në 24 mijë euro, me 25%.
Përjashtim nga taksa ENFIA për banesën e parë në fshatra me më pak se 1.500 banorë – fillimisht përgjysmim në 2026 dhe më pas heqje totale në 2027.
Ulje të TVSH-së me 30% në ishujt e vegjël kufitarë.
Rritje pagash dhe mbështetje për pensionistët
Më shumë se 151.000 punonjës të sektorëve të sigurisë dhe diplomacisë do të përfitojnë nga rritje pagash, përfshirë:
Ushtarakët
Policia
Zjarrfikësit
Roja bregdetare
Diplomatët
Për pensionistët, “diferenca personale” do të përgjysmohet në 2026 dhe hiqet plotësisht në 2027, duke sjellë përfitime për qindra mijëra përfitues.
Reforma deri në vitin 2030
Mitsotakis prezantoi edhe katër reforma afatgjata, që do të shtrihen deri në vitin 2030:
Një diplomë kombëtare e re për arsimin
Sistem shëndetësor publik i modernizuar
Modernizimi i urbanistikës dhe kadastrës
Hartë e re energjetike kombëtare
“Unë nuk jap premtime boshe dhe as para që nuk ekzistojnë. Jap vetëm plane konkrete për zhvillim, me synimin që në vitin 2027 vendi të hapë një kapitull të ri, edhe më të suksesshëm”, deklaroi Mitsotakis.
Protesta në rrugë
Në kontrast me tonin optimist të kryeministrit, Selaniku u përfshi pasditen e së shtunës nga protesta antiqeveritare të organizuara nga sindikatat kryesore të vendit. Protestat pasqyrojnë pakënaqësinë publike ndaj kostos së jetesës dhe krizës së strehimit.
Ndërkohë, në Athinë dhe qytete të tjera u mbajtën protesta për të kujtuar viktimat e tragjedisë së trenave dy vjet më parë, ku humbën jetën 57 persona. Familjarët e viktimave dhe qytetarët kërkuan drejtësi dhe llogaridhënie.
