Golfisti italian 17-vjeçar, Emanuele Galeppini, është identifikuar si viktima e parë e zjarrit të tmerrshëm që shpërtheu në barin Le Constellation në stacionin e skive Crans-Montana të Zvicrës, duke shkaktuar të paktën 40 të vdekur dhe 115 të plagosur gjatë festimeve të Vitit të Ri.
Federata Italiane e Golfit konfirmoi vdekjen e tij në një postim në Instagram, duke theksuar se organizata “vajton humbjen e Emanuele Galeppini, një sportist i ri që mbante me vete pasion dhe vlera të vërteta.” Postimi shtonte: “Emanuele, do të mbetesh përgjithmonë në zemrat tona.”
Autoritetet zvicerane kanë raportuar se nga 119 të plagosur, 113 janë identifikuar dhe përbëjnë shtetas të ndryshëm: 71 zviceranë, 14 francezë, 11 italianë, 4 serbë, 1 boshnjak, 1 holandez, 1 polak, 1 portugalez dhe 1 nga Luksemburgu. Katërmbëdhjetë persona mbeten pa identitet të konfirmuar.
Zyrtarët e hetuesisë po vijojnë procesin e identifikimit të viktimave, duke e konsideruar “prioritet absolut” rikthimin e mbetjeve të sakta tek familjet e tyre. Pesë nga të vdekurit ende nuk janë identifikuar.
Sipas hetimeve fillestare, zjarri ka nisur nga fishekzjarrët që vendoseshin mbi shishet e shampanjës dhe u afruan shumë pranë tavanit, duke shkaktuar flakë të shpejta. Nuk ka persona të arrestuar dhe zjarri konsiderohet një “aksident”.
Presidenti zviceran, Guy Parmelin, e përshkroi tragjedinë si “një dramë me përmasa të panjohura” dhe shprehu ngushëllimet më të thella për viktimat, të plagosurit dhe familjet e tyre.
Disa të mbijetuar, përfshirë 17-vjeçaren Laetitia Place dhe Samuel Rapp, rrëfyen për Reuters momentet e tmerrit, duke përshkruar grumbullimin kaotik të njerëzve pranë daljeve të ngushta dhe skenat e njerëzve të djegur dhe të vdekur përreth.
