Policia në Mbretëria e Bashkuar ka arrestuar katër persona të dyshuar për spiunazh në favor të Iran, pas një hetimi që lidhet me mbikëqyrjen e dyshuar të vendeve dhe individëve të komunitetit hebraik në Londër.
Sipas autoriteteve britanike, një nga të arrestuarit është shtetas iranian, ndërsa tre të tjerët kanë shtetësi të dyfishtë britanike dhe iraniane. Arrestimet u kryen në disa adresa në zonat Barnet dhe Harrow në Londër, si dhe në Watford, në veri të kryeqytetit britanik.
Operacioni është zhvilluar nga oficerët e njësisë së antiterrorizmit, të cilët kanë kryer gjithashtu kontrolle në prona të tjera në zonat Wembley dhe Barnet. Sipas policisë, hetimet janë ende në zhvillim dhe kërkimet në disa prej adresave të lidhura me të dyshuarit vazhdojnë.
Komisionerja e Metropolitan Police, Helen Flanagan, deklaroi se arrestimet janë pjesë e një operacioni të gjatë hetimor që synon zbulimin e aktiviteteve të mundshme të spiunazhit dhe kërcënimeve ndaj sigurisë kombëtare.
Autoritetet britanike kanë paralajmëruar prej vitesh për një kërcënim të mundshëm nga Irani ndaj interesave të Mbretërisë së Bashkuar dhe komuniteteve të caktuara në vend. Edhe Australia ka lidhur në të kaluarën disa sulme antisemitike me veprime të dyshuara të mbështetura nga Teherani.
Sipas policisë, të arrestuarit janë të moshës 22, 40, 52 dhe 55 vjeç. Ndërkohë, gjatë operacionit janë arrestuar edhe gjashtë persona të tjerë, të dyshuar për ndihmë dhe inkurajim të një krimineli.
Autoritetet nuk kanë bërë ende publike identitetin e të arrestuarve, ndërsa hetimet për rastin vazhdojnë.
