Një vendim gjykate në Los Anxhelos pritet të ndryshojë ndjeshëm debatin mbi platformat online. Gjykata ka shpallur përgjegjëse kompanitë Google dhe Meta për varësinë nga rrjetet sociale tek të rinjtë.
Vendimi erdhi në përfundim të një procesi gjyqësor të nisur pas padisë së një 20-vjeçareje nga Kalifornia. Ajo pretendoi se YouTube (në pronësi të Google) dhe Instagram (në pronësi të Meta) kanë ndikuar në përkeqësimin e shëndetit të saj mendor, duke e çuar drejt depresionit dhe mendimeve vetëvrasëse që në moshë të vogël.
Akuzat ndaj dy kompanive nuk lidhen vetëm me përmbajtjen e publikuar në platformat e tyre, por me mënyrën se si janë ndërtuar vetë rrjetet sociale. Avokatët e paditëses theksuan rolin e algoritmeve të rekomandimit, të cilat sugjerojnë vazhdimisht përmbajtje për t’i mbajtur përdoruesit sa më gjatë të lidhur me ekranin. Po ashtu, u kritikuan sistemi i njoftimeve dhe mungesa e filtrave që do të pengonin aksesin e të miturve në përmbajtje potencialisht të dëmshme.
Pas këtij vendimi, pritet që në Shtetet e Bashkuara të hapen mijëra procese të ngjashme gjyqësore. Gjithashtu, vendimi mund të detyrojë Meta dhe Google të rishikojnë mënyrën e funksionimit të platformave të tyre, duke ndryshuar disa nga mekanizmat kryesorë të algoritmeve të rekomandimit.
Rasti në Los Anxhelos lidhet me një të re që deklaroi se ishte bërë e varur nga aplikacionet që në moshë të vogël për shkak të mënyrës se si janë projektuar për të tërhequr vëmendjen e përdoruesve. Kjo qasje e akuzës – që u përqendrua te dizajni i platformës dhe jo te përmbajtja – e bëri më të vështirë për kompanitë që t’i shmangeshin përgjegjësisë.
Sipas Pew Research Center, të paktën gjysma e adoleshentëve amerikanë përdorin çdo ditë YouTube ose Instagram.
Në dekadën e fundit, kompanitë e mëdha të teknologjisë në SHBA janë përballur me kritika gjithnjë e më të forta për sigurinë e fëmijëve dhe adoleshentëve në internet. Tashmë debati është zhvendosur në gjykata dhe në nivel të shteteve federale, pasi Kongresi amerikan nuk ka arritur të miratojë një ligj të plotë për rregullimin e rrjeteve sociale.
