Një Gjykatë Federale Apeli në SHBA vendosi të premten se shumica e tarifave doganore të vendosura nga presidenti amerikan Donald Trump, ishin të paligjshme, duke konfirmuar kështu një vendim të mëparshëm të një gjykate më të ulët dhe duke vënë në pikëpyetje politikën tregtare të presidentit republikan.
Vendimi nuk prek tarifat që kanë të bëjnë me sektorë specifikë, siç janë ato për importet e çelikut dhe aluminit. Megjithatë, zbatimi i vendimit është pezulluar deri më 14 tetor, pasi pritet që çështja të kalojë në Gjykatën e Lartë të SHBA.
Presidenti Trump e cilësoi vendimin e Apelit si të gabuar, duke theksuar se të gjitha tarifat doganore që ai vendosi mbeten në fuqi.
“TË GJITHA TARIFAT MBETEN NË FUQI,” shkroi Trump në një postim në platformën e tij “Truth Social”. Ai shtoi: “Një Gjykatë Apeli shumë e njëanshme vendosi gabimisht që tarifat tona duhet të hiqen, por ata e dinë që Shtetet e Bashkuara të Amerikës do të fitojnë në fund.”
Në qendër të këtij konflikti ligjor qëndron pyetja nëse Trump kishte të drejtë të përdorte një ligj të vjetër të emergjencave ekonomike për të vendosur tarifa të larta ndaj partnerëve kryesorë tregtarë të SHBA.
Edhe pse ligji nuk përmend shprehimisht tarifat doganore, Trump e ka përdorur atë për të vendosur ngarkesa të reja ndaj shumë vendeve, me qëllim ristrukturimin e marrëdhënieve tregtare dhe gjenerimin e miliarda dollarëve të ardhura për buxhetin amerikan.
Kjo qasje e Trump u sfidua menjëherë në gjykata nga biznese të vogla dhe disa shtete amerikane, të cilat argumentuan se u dëmtuan ekonomikisht nga këto tarifa të vendosura pa të drejtë.
Në maj, një gjykatë tregtare federale dha të drejtë paditësve, duke anuluar shumë prej tarifave të vendosura nga Trump, me arsyetimin se ligji në fjalë nuk i jep presidentit “fuqi të pakufizuar” për të zhvilluar një luftë tregtare globale.
Administrata Trump e apeloi menjëherë vendimin, dhe gjykata lejoi që tarifat të mbeten në fuqi përkohësisht, ndërsa ligjshmëria e tyre po shqyrtohet. Kjo i hapi rrugën Shtëpisë së Bardhë të asaj kohe për të zgjeruar përdorimin e tarifave, me një valë të re tarifash ndaj mbi 90 vendeve edhe përpara se Apeli të jepte vendimin final.
Gjatë mandatit të tij të dytë në Shtëpinë e Bardhë, Trump ka kthyer tarifat në një shtyllë kyçe të politikës së jashtme amerikane, duke i përdorur ato si mjet presioni politik dhe për të rinegociuar marrëveshje tregtare me vendet që eksportojnë mallra drejt SHBA. Kjo strategji i ka dhënë administratës së tij avantazhe në arritjen e marrëveshjeve ekonomike, por ka shkaktuar gjithashtu pasiguri dhe luhatje në tregjet ndërkombëtare.
