Gjykata e Lartë e Izraelit ka urdhëruar autoritetet të përmirësojnë menjëherë kushtet ushqimore për të burgosurit palestinezë, duke theksuar se shteti ka detyrim ligjor të garantojë “nivelin bazë të ekzistencës”. Padia u ngrit nga Organizata për të Drejtat Civile në Izrael (ACRI), e cila paralajmëroi për raste kequshqyerjeje e urie.
Vendimi vjen mes presionit në rritje ndaj qeverisë izraelite dhe protestave masive për lirimin e pengjeve në Gaza. Presidenti amerikan Donald Trump lëshoi një “paralajmërim të fundit” për Hamasin që të pranojë marrëveshjen për lirimin e pengjeve, ndërsa Hamasi deklaroi gatishmëri për negociata.
Në terren, ofensiva izraelite vijon me bombardime, duke vrarë 87 persona në 24 orët e fundit. Sipas Ministrisë së Shëndetësisë në Gaza, numri i viktimave palestineze ka arritur në mbi 64 mijë, shifra të cilat OKB i konsideron të besueshme.
