Gjykata Ndërkombëtare e Drejtësisë (GJND) ka lëshuar një deklaratë të fortë kundër Izraelit, duke e akuzuar për shkelje të detyrimeve të tij ndërkombëtare lidhur me kufizimin e ndihmës humanitare në Rripin e Gazës. Sipas vendimit, Izraeli është ligjërisht i detyruar të lejojë hyrjen dhe shpërndarjen e ndihmave humanitare të organizatave të OKB-së për popullsinë palestineze që po përballet me një krizë të rëndë humanitare për shkak të konfliktit të vazhdueshëm me Hamasin.
Në opinionin e saj, Gjykata thekson se ndalimi i furnizimeve bazë, ushqimit, ilaçeve dhe ndihmave të tjera jetike për civilët palestinezë përbën shkelje të parimeve të së drejtës ndërkombëtare dhe të detyrimeve që ka Izraeli si forcë pushtuese.
"Nuk mund të përdoret kurrësesi motivi i sigurisë për të justifikuar pezullimin e përgjithshëm të të gjitha aktiviteteve humanitare në territorin e pushtuar,” deklaroi gjykatësi Iwasawa Yuji, duke nënvizuar se popullsia civile në Gaza “nuk është furnizuar mjaftueshëm dhe po përballet me kushte jashtëzakonisht të vështira mbijetese”.
GJND theksoi se Izraeli duhet të bashkëpunojë me të gjitha agjencitë humanitare të OKB-së, përfshirë Agjencinë e Ndihmës dhe Punës për Refugjatët Palestinezë (UNRWA), si dhe organizatat ndërkombëtare që veprojnë në territoret palestineze.
Nga ana tjetër, autoritetet izraelite kanë deklaruar se janë të gatshme të bashkëpunojnë me UNRWA-n dhe organizatat e tjera humanitare, megjithëse më herët parlamenti izraelit kishte miratuar ligje që ndalonin aktivitetin e kësaj agjencie në territorin izraelit dhe kontaktin e saj me zyrtarët qeveritarë. Asambleja e Përgjithshme e OKB-së kishte kërkuar në dhjetor të vitit të kaluar që Gjykata Ndërkombëtare të jepte një mendim mbi detyrimet ligjore të Izraelit ndaj agjencive të OKB-së dhe organizatave ndërkombëtare që operojnë në Bregun Perëndimor dhe në Rripin e Gazës.
Vendimi i fundit i GJND-së, megjithëse nuk ka fuqi detyruese ligjore, mbart peshë të madhe morale, diplomatike dhe politike, duke rritur presionin ndërkombëtar ndaj Izraelit për të respektuar të drejtën humanitare dhe për të siguruar ndihmën e domosdoshme për civilët palestinezë.
