Gjermania po përballet me një debat të nxehtë politik mbi të ardhmen e shtetit të saj social, një prej sistemeve më të lakmuara në Evropë. Sigurimi shëndetësor, sigurimi i kujdesit afatgjatë për të moshuarit, pensionet dhe përfitimet e papunësisë po hasin gjithnjë e më shumë vështirësi financiare. Qeveria federale është e detyruar të injektojë rregullisht shuma të mëdha të të ardhurave nga tatimet për të shmangur kolapsin e këtyre sistemeve. Koalicioni qeverisës CDU/CSU-SPD, me ardhjen në pushtet, kishte premtuar reforma gjithëpërfshirëse për modernizimin e sigurimeve shoqërore. Megjithatë, aktualisht brenda koalicionit ka mosmarrëveshje të thella për mënyrën se si duhet të realizohet ky reformim: a duhet të shoqërohet me shkurtime, në çfarë mase dhe cilat sektorë duhet të preken?
Kancelari Friedrich Merz, duke iu drejtuar opinionit publik, u shpreh hapur mbi gjendjen e rëndë të sistemit:
“Shteti social siç e kemi sot nuk është më i financueshëm me atë që po arrijmë ekonomikisht. Apeli im megjithatë u drejtohet të gjithëve: Le të tregojmë së bashku se ndryshimi është i mundur, se reformat janë të mundshme.”, tha Merz.
Deklarata e kancelarit erdhi pas një propozimi të socialdemokratëve (SPD) për rritjen e tatimeve. Zëvendëskancelari Lars Klingbeil kishte theksuar se nuk përjashton mundësinë e rritjes së taksave për shtresat me të ardhura të larta dhe për të pasurit. “Asnjë opsion nuk hiqet nga tavolina,” deklaroi ai për televizionin ZDF.
Kjo qasje është refuzuar nga partneri më i madh në qeveri, CDU, e cila kundërshton çdo barrë shtesë mbi bizneset e vogla dhe të mesme. Kancelari Merz theksoi se do të qëndrojë i palëkundur në këtë pikë, duke përjashtuar rritje të tatimeve që do të preknin ekonominë reale.
Nga ana tjetër, brenda SPD-së ka mbështetje të dukshme për idenë e tatimeve më të larta mbi të ardhurat e larta, ndërsa kundërshtim të prerë ndaj çdo shkurtimeje të shërbimeve sociale. Kreu i Juso-s, organizata rinore e SPD-së, Philipp Türmer, e quajti këtë një “vijë të kuqe” për partinë:
“Nëse ideja pas një vjeshte reformash është shkurtimi i shërbimeve sociale dhe i përfitimeve, mund të them pa mëdyshje: SPD nuk mund të lëvizë as edhe një centimetër në drejtim të tillë,” u shpreh ai për gazetën Stuttgarter Zeitung.
Kështu, Gjermania ndodhet përballë një prove të madhe politike e sociale: një sistem i shquar për mbrojtjen e qytetarëve të saj, i vënë sot nën presion të fortë financiar, kërkon reforma të thella. Dilema është nëse këto reforma do të shkojnë drejt shkurtimeve të dhimbshme apo drejt barrës shtesë fiskale mbi shtresat e pasura të shoqërisë.
