Dy vite më parë, qyteti më i madh i Gazës ishte plot jetë: shkollat gumëzhinin nga nxënësit, tregjet mbusheshin me blerës dhe kafenetë buzë detit ofronin pak qetësi mes një jete të rrethuar nga kufizimet.
Me një histori mijëravjeçare dhe qindra vende arkeologjike, Gaza është prej kohësh qendra kulturore dhe ekonomike e enklavës palestineze. Pikërisht për këtë, Hamasi e zgjodhi qytetin si kryeqytetin e tij de facto kur mori kontrollin në vitin 2007. Por sot, qyteti ndodhet në rrënoja. Pas muajsh bombardimesh izraelite, të nisura si hakmarrje për sulmin e Hamasit gati dy vite më parë, Gaza City është kthyer në një hapësirë të ligësisë dhe pasigurisë. Institucionet e dikurshme janë shkatërruar, Hamas nuk shihet më hapur në rrugë dhe civilët përballen çdo ditë me frikën e mbijetesës.
Jeta e përditshme mes rrënojave
Me policinë e Hamasit të zhdukur, qyteti është zhytur në anarki. Mijëra banorë jetojnë në ndërtesa të shkatërruara, pa ujë, pa ushqime dhe pa mjekime. Spitalet nuk funksionojnë më, tregjet shesin produkte të rralla me çmime marramendëse, ndërsa plehrat dhe ujërat e zeza kanë mbuluar rrugët.
Natën, grupe të armatosura patrullojnë qytetin, ndërsa familjet përpiqen të mbrojnë veten me armë. Të dëshpëruar, banorët tregojnë se edhe qentë endacakë janë bërë të rrezikshëm pasi ushqehen me trupat e pajetë në rrugë. “Pluhuri i shpërthimeve na mbyt. Qentë kanë ndryshuar, janë bërë të egër. Njerëzit kanë humbur çdo forcë nga uria e pafund,” tha për CNN një banor i qytetit.
Hamasi i padukshëm
Ndërkohë, Hamasi – dikur i pranishëm kudo – tani është zhdukur nga rrugët. Zyrat, stacionet policore dhe qendrat komunale të tij janë shkatërruar. Megjithatë, militantët shfaqen herë pas here në mënyrë të befasishme, duke treguar se organizata ende ka rrjete të fshehta komunikimi dhe kontrolli. Gazetarë dhe banorë lokalë pyesin për qëllimin e armëve të Hamasit, të cilat nuk kanë arritur të mbrojnë civilët nga uria, vdekjet dhe shkatërrimi.
Përgatitjet izraelite për ofensivën
Izraeli ka paralajmëruar se një ofensivë e madhe në Gaza City është e pashmangshme. Kryeministri Netanyahu e ka cilësuar qytetin si një nga bastionet e fundit të Hamasit në veri të enklavës. Për këtë, ushtria izraelite pritet të thërrasë mbi 60 mijë rezervistë të rinj dhe të zgjasë shërbimin e 20 mijë të tjerëve. Sipas burimeve ushtarake, civilëve do t’u jepen rreth dy muaj për t’u larguar përpara nisjes së operacionit, me një afat simbolik më 7 tetor – dyvjetori i luftës. Megjithatë, ofensiva po shoqërohet me paralajmërime nga organizata ndërkombëtare dhe qeveri të huaja, të cilat shprehin shqetësim për numrin e lartë të viktimave civile, akuzat për krime lufte dhe pengimin e ndihmave humanitare.
“Operacioni mund të zgjasë me muaj, duke hyrë në çdo ndërtesë dhe duke shkatërruar tunelin pas tuneli. E mundur është, por jashtëzakonisht e vështirë dhe me kosto të mëdha njerëzore,” tha një ekspert ushtarak për CNN.
