Koka e Mbretit Toera të Madagaskarit, i cili u vra nga trupat koloniale franceze në fund të shekullit të 19-të, është kthyer zyrtarisht në atdhe, së bashku me kafkat e dy anëtarëve të tjerë të oborrit të tij.
Ceremonia e dorëzimit u mbajt në Ministrinë e Kulturës në Paris, ku ministrja franceze e Kulturës, Rachida Dati, deklaroi se "këto kafka u futën në koleksionet kombëtare në rrethana që shkelin qartë dinjitetin njerëzor dhe në një kontekst dhune koloniale".
Në gusht të vitit 1897, trupat franceze sulmuan Mbretërinë Menabé të popullit Sakalava në perëndim të Madagaskarit, duke masakruar ushtrinë vendase. Mbreti Toera u vra dhe u dekapitua, ndërsa koka e tij u dërgua në Paris dhe u ruajt në Muzeun e Historisë Natyrore.
Edhe pse provat e ADN-së për të vërtetuar nëse kafka i përket vërtet mbretit kanë qenë të paqarta, një medium shpirtëror tradicional i Sakalavëve konfirmoi identitetin e saj.
Ministrja e Kulturës së Madagaskarit, Volamiranty Donna Mara, e cilësoi kthimin si një “gjest domethënës”, duke thënë se “mungesa e tyre ka qenë për më shumë se një shekull... një plagë e hapur në zemrën e ishullit”.
Ky kthim është i pari që realizohet në bazë të një ligji të ri francez që synon të përshpejtojë rikthimin e mbetjeve njerëzore të marra gjatë epokës koloniale.
Franca ka nisur në vitet e fundit një proces të kthimit të mbetjeve njerëzore të marra nga kolonitë, përfshirë rastin e famshëm të gruas nga Afrika e Jugut e njohur si “Venusi Hottentot”, e cila u kthye në vendin e saj në vitin 2012.
