Dy palestinezë janë vrarë nga forcat izraelite në Bregun Perëndimor, megjithëse ishin dorëzuar. Ngjarje ka bërë xhiron e botës dhe ka shkaktuar reagime të forta ndërkombëtare.
Dy burrat ishin duke dalë nga një ndërtesë në Xhenin, duke ngritur bluzat për të treguar se nuk mbanin eksplozivë dhe me duart lart në shenjë dorëzimi. Pasi ushtarët izraelitë i urdhëruan të ktheheshin brenda, ata u qëlluan në mënyrë të menjëhershme.
Një gazetar i Reuters raportoi se kishte parë në tokë trupat e pajetë të dy viktimave, të identifikuar nga autoritetet palestineze si 26-vjeçari al Muntasir Abdullah dhe 37-vjeçari Yousef Asasa.
Palestinezët e kanë cilësuar ngjarjen si “ekzekutim me gjakftohtësi”, ndërsa komentet në rrjetet sociale e kanë përshkruar si një “ekzekutim të pastër”.
Në një deklaratë, Ushtria Izraelite (IDF) tha se operacioni në Xhenin kishte për qëllim kapjen e personave të kërkuar për aktivitete të dyshuara terroriste, por shtoi se incidenti po shqyrtohet nga komandantët në terren dhe do t’i kalojë autoriteteve përkatëse për hetim të mëtejshëm.
Megjithatë, sipas palestinezëve dhe organizatave të të drejtave të njeriut, hetimet izraelite për episode të tilla rrallë përfundojnë me përgjegjësi penale.
