46 anijet e Global Sumud Flotilla, të nisura nga Kreta me destinacion Gazën, po lundrojnë në ujërat ndërkombëtare të shoqëruara nga dronë, mes frikës së një sulmi të ri pas atyre të ditëve të fundit. Zëdhënësja italiane e misionit, Maria Elena Delia, tha se deri tani nuk ka pasur sulme, por situata mbetet e rrezikshme. Një pjesë e anijeve është dëmtuar më herët, mes tyre edhe Zefiro, kapiteni i së cilës, Stefano Bertoldi, paralajmëroi se një tjetër sulm “mund të sjellë të plagosur rëndë apo edhe viktima”.
Bertoldi u bëri thirrje qytetarëve të mobilizohen: “Mos i lini vetëm aktivistët, qeveritë nuk do bëjnë asgjë për ne. Është koha e popullit, të dalim në sheshe për të mbrojtur jetët e tyre”. Ai kritikoi qeverinë italiane dhe ministrin e Mbrojtjes Guido Crosetto për “qëndrim të papërgjegjshëm”, pasi Roma është angazhuar vetëm për të shpëtuar të plagosurit në rast sulmi.
Në planin politik, ministri i Jashtëm Antonio Tajani u bëri thirrje aktivistëve të kthehen mbrapsht, duke kujtuar edhe apelimin e presidentit Sergio Mattarella që ndihmat të dërgohen përmes patriarkatit të Jeruzalemit. Në të njëjtën kohë, ministria e Jashtme izraelite akuzoi flotilën se nuk ka pranuar ofertat për të dorëzuar ngarkesën në Qipro dhe se misioni ka “vetëm qëllim provokues për të shërbyer Hamasit”.
Nga ana tjetër, rrjeti Stop ReArm Europe, ku bëjnë pjesë mbi 200 organizata, paralajmëroi se nëse flotila do të sulmohet, Italia do të përballet me protesta të gjera dhe një “shtetëzim social”, kundër politikave të riarmatosjes dhe në mbështetje të Palestinës.
