Dhjetëra anije dhe mijëra aktivistë po përgatiten të nisen drejt Gazës midis 31 gushtit dhe 4 shtatorit, pjesë e iniciativës së shoqërisë civile Global Sumud Flotilla. Qëllimi i tyre është të dërgojnë ndihma humanitare dhe të ushtrojnë presion mbi komunitetin ndërkombëtar për të ndërhyrë ndaj situatës së rëndë në zonë.
Datat dhe portet e nisjes janë të ndryshme: më 31 gusht flota e parë do të niset nga Spanja dhe nga Genova, ndërsa më 4 shtator pjesa tjetër do të niset nga Sicilia, Tunizia dhe Greqia. Të gjitha anijet do të nisen drejt Gazës, duke mbledhur përfaqësues nga shumë vende të botës.
Ndërkohë që është i njohur rreziku i një reagimi të dhunshëm, aktivistët, përfshirë edhe Greta Thunberg, do të nisen nga Barçelona pavarësisht ndalimit të mëparshëm të hyrjes në Izrael. Në ekipet e anijeve do të jenë edhe eurodeputetë, gazetarë, avokatë dhe mjekë. Emri “Sumud” në arabisht tregon rezistencë, qëndrueshmëri, forcë dhe këmbëngulje.
Kjo iniciativë vjen pas përpjekjeve të mëparshme të Global March to Gaza dhe Maghreb Sumud Convoy për të arritur në zonë përmes tokës, dhe ka përfshirë edhe një bllok nga Azia Juglindore me pjesëmarrës nga Indonezia, Pakistani, Maldivet, Sri Lanka, Bangladeshi, Tajlanda dhe Filipinet.
Organizatorët theksojnë se është një iniciativë paqësore dhe jo e dhunshme. Për këtë arsye, flota përbëhet nga anije të vogla me jo më shumë se njëmbëdhjetë pasagjerë, për të shmangur keqkuptimet dhe për të mos u parë si kërcënim. Megjithatë, reagimet e Izraelit ndaj misioneve të mëparshme kanë qenë gjithmonë të dhunshme, duke përfshirë sulme me dron dhe arrestime aktivistësh në ujërat ndërkombëtare.
Organizatorët pranojnë se ekziston rreziku i një reagimi të dhunshëm, por theksojnë se nuk mund të qëndrojnë indiferentë përballë situatës në Gazë, ku shkeljet e të drejtave ndërkombëtare dhe mungesa e humanitetit janë evidente. Ata kërkojnë që qeveritë e vendeve të përfaqësuara të garantojnë sigurinë e pjesëmarrësve.
Në Itali, në Genova dhe në disa portet e tjera, po organizohet mbledhja e ndihmave humanitare dhe ilaçeve, me objektivin për të dërguar mbi 45 tonë ndihma drejt Gazës, dhe organizatorët synojnë të tejkalojnë këtë sasi.
Ky mision shënon një nga përpjekjet më të mëdha të shoqërisë civile për të thyer bllokadën dhe për të tërhequr vëmendjen ndërkombëtare mbi krizën humanitare në Gazë.
Marrë nga La Repubblica
