Fëmijët në veri të Gazës po rrezikojnë jetën çdo ditë për të ndjekur mësimin në shkolla të improvizuara me çadra, të ngritura pranë pozicioneve izraelite, ndërsa UNICEF paralajmëron se trauma e luftës do të ketë pasoja afatgjata te brezi më i ri.
Në Beit Lahiya, nxënës nga familje të zhvendosura ndjekin mësimin në atë që Izraeli e ka shpallur “zona e verdhë”, një territor i rrezikshëm në perëndim të vijës ndarëse, shpesh vetëm pak metra larg zonave të zjarrit. Lufta ka shkatërruar pjesën dërrmuese të infrastrukturës arsimore të Gazës, duke i detyruar familjet dhe mësuesit të krijojnë ambiente mësimore të përkohshme mes rrënojave.
Në një çadër të vogël, nën zhurmën e pandërprerë të të shtënave, shtatëvjeçarja Tulin përgatitet për ditën e saj të parë të shkollës pas dy vitesh ndërprerje. Për nënën e saj, rruga drejt shkollës është një përjetim i vazhdueshëm frike. “Derisa vajza ime arrin në shkollë, ec me zemrën në dorë,” tha ajo. “Shpesh e ndjek pas nga frika, por dua që ajo të mësojë. Në kushte normale, tani do të ishte në klasën e dytë.”
Rruga drejt klasës është e rrezikshme. Mes rrënojave të qytetit, fëmijët ecin në hapësira të hapura, të ekspozuara ndaj të shtënave. “Kur shkoj në shkollë, kam frikë nga plumbat,” tha Tulin. “Nuk ka mure ku të fshihemi.”
As brenda çadrave nuk ka siguri. Muret prej pëlhure nuk ofrojnë asnjë mbrojtje nga plumbat, ndërsa nxënësit ulen përtokë për të ndjekur mësimin. Një mësuese përshkroi se si procesi mësimor ndërpritet shpesh nga zjarri i snajperëve. “Kur fillojnë të shtënat, u themi fëmijëve të shtrihen në tokë,” tha ajo. “Lutemi që të mos ketë të lënduar. Megjithatë, vazhdojmë. Politika e pushtimit është injoranca, ndërsa e jona është dijenia.”
Mes nxënësve është edhe Ahmed, i cili humbi babanë gjatë luftës. “Vijmë dhe largohemi me vështirësi për shkak të të shtënave,” tha ai. “Por dua të realizoj ëndrrën e babait tim të rënë dëshmor, që të bëhem mjek.”
Organizatat ndërkombëtare paralajmërojnë se përveç rrezikut fizik, fëmijët e Gazës po përballen me trauma të thella psikologjike, të cilat mund të ndikojnë për vite me radhë në zhvillimin dhe të ardhmen e tyre.
