Presidenti i SHBA-së, Donald Trump, deklaroi të mërkurën se nuk është i shqetësuar nga mundësia e sulmeve të mbështetura nga Irani në territorin amerikan, edhe pse Byroja Federale e Hetimit (FBI) ka paralajmëruar për një kërcënim të mundshëm me dronë ndaj Bregut Perëndimor të Shteteve të Bashkuara.
Sipas një raportimi të ABC News, FBI ka njoftuar departamentet e policisë në Kaliforni se Irani mund të hakmerret për sulmet amerikane duke lëshuar dronë drejt objektivave në Bregun Perëndimor.
SHBA dhe Izraeli ndërmorën sulme ndaj Iranit rreth dy javë më parë, duke e zhytur rajonin e Gjirit në një konflikt të ri. Teherani ka reaguar me sulme hakmarrëse pas operacioneve amerikano-izraelite që vranë disa zyrtarë të lartë iranianë, përfshirë edhe udhëheqësin suprem të vendit.
I pyetur nga gazetarët nëse është i shqetësuar që Irani mund të zgjerojë hakmarrjen duke goditur territorin amerikan, Trump u përgjigj shkurt: “Jo, nuk jam.”
Sipas një alarmi të shpërndarë nga FBI në fund të shkurtit, agjencia ka marrë informacione se që nga fillimi i shkurtit 2026, Irani dyshohet se kishte aspiruar të kryente një sulm të befasishëm me mjete ajrore pa pilot (dronë) nga një anije e paidentifikuar në brigjet e Shteteve të Bashkuara, duke synuar objektiva të papërcaktuara në Kaliforni në rast se SHBA do të ndërmerrte sulme kundër Iranit.
Megjithatë, FBI theksoi se nuk ka informacione shtesë për kohën, metodën, objektivat apo autorët e mundshëm të një sulmi të tillë.
Zyrtarë të FBI-së, policisë së Los Anxhelosit, zyrës së guvernatorit të Kalifornisë dhe bashkisë së Los Anxhelosit nuk iu përgjigjën menjëherë kërkesave për koment.
Më herët gjatë këtij muaji, Reuters raportoi se Irani dhe aleatët e tij mund të synojnë objektiva amerikane si përgjigje ndaj sulmeve të SHBA-së.
Ndërkohë, një vlerësim i kërcënimeve i përgatitur nga Zyra e Inteligjencës dhe Analizës në Departamentin amerikan të Sigurisë Kombëtare vlerëson se Irani dhe grupet e lidhura me të “ka të ngjarë” të paraqesin rrezik për sulme të targetuara në SHBA, edhe pse një sulm fizik në shkallë të gjerë konsiderohet pak i mundshëm.
