Këtë e thotë famullitari i Gazës, ati Gabriel Romanelli. "Ka mbërritur një urdhër për evakuimin e të gjithë lagjes. Dhe kanë thënë se kanë filluar të shpërndajnë çadra. Dikush mund të mendojë se është një lajm i mirë, 'sa bukur!', por kjo ka të bëjë me evakuimin e të gjithë qytetit të Gazës", por "ku mund të gjejnë vend të gjithë banorët" e Rripit, "dy milionë e treqind mijë persona...". Gjatë meshës së djeshme "dëgjuam një shpërthim shumë të madh afër që theu një depozitë uji, fatmirësisht nuk ndodhi asgjë, vetëm dëme materiale", "një të diel tjetër lufte".
Famullitari i Familjes së Shenjtë në Gaza, ati Gabriel Romanelli, në përditësimin e përditshëm mbi kushtet e jetesës në famulli, e cila ndodhet në lagjen al-Zaytun të Gazës, në veri të Rripit, flet gjithashtu për "shenja kontradiktore" sepse "një shoqatë shpërndau pak perime, domate, patate" dhe "njerëzit janë të kënaqur sepse u pëlqejnë dhe kanë nevojë për to". Por pastaj vjen për të gjithë lagjen urdhri për evakuim dhe njoftimi për shpërndarjen e çadrave për zhvendosje. Një muaj pas sulmit ndaj vetë famullisë, më 17 korrik, misionari argjentinas kujton se "fëmijët kanë nevojë për gjithçka". Për situatën e konfliktit në përgjithësi ai komenton: "Nuk ka marrëveshje, nuk duan të lirojnë pengjet, ose vetëm pjesërisht, pala tjetër thotë ‘jo, të gjithë bashkë’... e vetmja gjë e sigurt është që bombat vazhdojnë të shkaktojnë vdekje, civilë, fëmijë, numrat janë të tmerrshëm".
Të paktën 11 palestinezë janë vrarë nga sulmet e ushtrisë izraelite (IDF) në Rripin e Gazës që nga agimi i sotëm, përfshirë katër persona ndërsa prisnin ndihmat humanitare: kështu raporton Al Jazeera.
