Fëmijët e regjisorit të njohur hollivudian Rob Reiner dhe bashkëshortes së tij, Michele Reiner, kanë reaguar për herë të parë publikisht pas vrasjes së prindërve të tyre dhe arrestimit të vëllait, Nick Reiner, i cili akuzohet për krimin.
Jake dhe Romy Reiner thanë të mërkurën se po kalojnë një “dhimbje të paimagjinueshme”, duke e cilësuar humbjen e prindërve si “horrifike dhe shkatërruese”. Në deklaratën e dhënë për CBS News, ata kërkuan privatësi dhe respekt, si dhe që publiku dhe mediat të tregojnë përmbajtje dhe njerëzi në trajtimin e ngjarjes, pa komentuar drejtpërdrejt akuzat ndaj vëllait të tyre.
Nick Reiner, 32 vjeç, u paraqit për herë të parë në gjykatë të mërkurën, ku nuk dha deklaratë për dy akuzat për vrasje të shkallës së parë. Rob dhe Michele Reiner u gjetën të pajetë të dielën në shtëpinë e tyre në Los Anxhelos. Nick Reiner u arrestua po atë mbrëmje dhe u akuzua zyrtarisht një ditë më vonë.
Gjatë seancës, prokuroria dhe mbrojtja ranë dakord që seanca e radhës, ku ai do të deklarohet nëse është fajtor apo jo, të mbahet më 7 janar. Deri atëherë, ai do të qëndrojë në paraburgim në qendrën korrektuese Twin Towers në Los Anxhelos.
Avokati i Nick Reiner, Alan Jackson, tha se çështja është e ndërlikuar dhe serioze, duke kërkuar që procesi ligjor të zhvillohet pa paragjykime dhe pa nxituar në përfundime. Sipas juristëve, shtyrja e deklarimit mund të lidhet me nevojën për një vlerësim psikiatrik, për të parë nëse i akuzuari është në gjendje të përballet me gjyqin.
Nëse shpallet fajtor, Nick Reiner përballet me burgim të përjetshëm pa mundësi lirimi me kusht ose edhe me dënim me vdekje, megjithëse prokuroria ende nuk ka vendosur nëse do ta kërkojë këtë dënim.
Rob Reiner ishte një nga regjisorët më të njohur të Hollivudit, autor i filmave të famshëm si This Is Spinal Tap, Misery dhe A Few Good Men. Michele Reiner ishte aktore, fotografe dhe producente, si dhe themeluese e kompanisë së prodhimit Reiner Light.
Shefi i Policisë së Los Anxhelosit, Jim McDonnell, e cilësoi ngjarjen si “zemërthyese dhe thellësisht personale”, duke theksuar se ajo ka prekur jo vetëm familjen Reiner, por edhe gjithë qytetin.
