Në Liban, lufta nuk po zhvillohet vetëm në rrugë, por edhe në spitale dhe klinika. Punonjës të shëndetësisë janë vrarë ndërsa trajtonin pacientë ose përpiqeshin të ndihmonin të plagosurit, duke treguar koston e rëndë njerëzore të sulmeve të vazhdueshme.
Sipas Ministrisë së Shëndetësisë së Libanit, që nga 2 marsi sulmet ajrore izraelite kanë vrarë të paktën 31 profesionistë shëndetësorë dhe kanë plagosur 51 të tjerë. Po sipas autoriteteve, Izraeli ka kryer të paktën 37 sulme ndaj punonjësve të emergjencës mjekësore.
Drejtori i përgjithshëm i Organizatës Botërore të Shëndetësisë, Tedros Adhanom Ghebreyesus, i dënoi sulmet ndaj personelit shëndetësor, duke i quajtur ato një “zhvillim tragjik në përshkallëzimin e krizës në Lindjen e Mesme”.
Bilanci i viktimave tregon edhe intensitetin e konfliktit dhe presionin mbi sistemin shëndetësor të Libanit, i cili po përpiqet të trajtojë më shumë se 2,000 civilë të plagosur, ndërsa 826 persona janë vrarë që nga fillimi i dhunës.
Pasojat e luftës u panë qartë të premten në mbrëmje, kur një sulm ajror izraelit goditi një qendër shëndetësore në Borj Qalaouiyeh, në jug të Libanit. Sipas Ministrisë së Shëndetësisë, pothuajse i gjithë stafi mjekësor – përfshirë mjekë, infermierë dhe paramedikë – u vra. Vetëm një punonjës mbijetoi me plagë të rënda, ndërsa 12 persona humbën jetën dhe katër të tjerë rezultojnë të zhdukur.
Autoritetet libaneze e cilësuan sulmin si “sjellje kriminale”, duke akuzuar Izraelin për sulme të gjera ndaj personelit dhe objekteve mjekësore, përfshirë edhe ambulancat që ndihmonin të plagosurit në vijën e frontit.
Këtë javë edhe Kryqi i Kuq Libanez njoftoi se një nga vullnetarët e tij, Youssef Assaf, vdiq nga plagët që mori teksa po ndihmonte viktimat e një sulmi ajror në jug të vendit.
Nga ana e tij, ushtria izraelite deklaroi se është në dijeni të raportimeve për sulmin në Borj Qalaouiyeh dhe se incidenti është duke u shqyrtuar.
Izraeli thotë se objektivi i tij janë pozicionet e Hezbollahut, duke synuar infrastrukturën dhe objektet që përdoren për sulme kundër Izraelit. Grupi i mbështetur nga Irani kishte nisur raketa drejt Izraelit menjëherë pasi SHBA dhe Izraeli filluan sulmet ndaj Iranit më 28 shkurt.
Zëdhënësi i ushtrisë izraelite, Avichay Adraee, akuzoi Hezbollahun për “përdorim të gjerë ushtarak të ambulancave dhe objekteve mjekësore”, megjithëse nuk dha detaje konkrete apo prova nëse qendra shëndetësore e goditur përdorej nga grupi.
Një zyrtar i lartë i Hezbollahut i tha New York Times se këto akuza janë të pavërteta dhe synojnë të justifikojnë sulmet.
Punonjësit dhe institucionet shëndetësore në Liban kanë qenë edhe më parë në shënjestër. Gjatë konfliktit të vitit 2024, dhjetëra punonjës të shpëtimit u vranë dhe qindra ambulanca dhe objekte shëndetësore u dëmtuan.
“Sulmet ndaj ambulancave, qendrave të kujdesit parësor dhe personelit mjekësor janë jashtëzakonisht alarmante,” tha Ramzi Kaiss, studiues për Libanin në Human Rights Watch. “Sipas ligjeve të luftës, mjekët, infermierët dhe paramedikët janë të mbrojtur në çdo rrethanë dhe nuk duhet të jenë kurrë objektiv.”
