Presidenti turk Recep Tayyip Erdoğan, duke folur të martën para Asamblesë së Përgjithshme të OKB-së, u bëri thirrje të gjithë liderëve botërorë që në emër të njerëzimit të qëndrojnë fuqishëm pranë palestinezëve të shtypur.
“Sot jemi këtu në këtë foltore për të folur në emër të popullit palestinez, zëri i të cilit përpiqet të heshtë, së bashku me qytetarët tanë,” tha Erdoğan.
Ai falenderoi të gjitha shtetet që deri tani e kanë njohur Palestinën dhe bëri thirrje për ato që nuk e kanë bërë ende “të veprojnë pa vonesë.”
Erdoğan theksoi se Izraeli vret një fëmijë çdo orë në Gaza që prej 23 muajsh: “Këto nuk janë thjesht numra, janë njerëz të pafajshëm.”
“Çdo ditë, 2,5 milionë banorë të Gazës, në një territor prej 365 kilometra katrorë, shpërngulen dhe detyrohen të zhvendosen diku tjetër,” shtoi ai.
Ai vuri në dukje se “fëmijët e pafajshëm, vetëm dy ose tre vjeç, pa duar ose këmbë, sot janë një pamje e zakonshme e Gazës.”
“Njerëzimi në shekullin e fundit nuk ka qenë dëshmitar i një krimi kaq brutal sa gjenocidi izraelit në Gaza,” theksoi Erdoğan.
“Nëse një gjemb pickon një fëmijë në dorë, zemra e prindit dhemb. Por në Gaza fëmijëve u amputohen pjesë të trupit pa anestezi. Kjo është pika më e ulët e njerëzimit,” tha ai, duke pyetur: “Çfarë ndërgjegjeje mund ta përballojë këtë, çfarë ndërgjegjeje mund të heshtë? A mund të ketë paqe në një botë ku fëmijët vdesin nga uria dhe mungesa e ilaçeve?”
Erdogan tha se okupimi izraelit, nën justifikimin e ngjarjeve të 7 tetorit 2023, nuk është luftë kundër terrorizmit, por “politikë dëbimi, persekutimi, gjenocidi dhe masakre të mëdha.”
“Izraeli nuk kufizohet vetëm në Gaza dhe Bregun Perëndimor; sulmet ndaj Sirisë, Iranit, Jemenit dhe Libanit gjithashtu kërcënojnë paqen rajonale,” paralajmëroi ai.
Ai shtoi se “nuk ka luftë në Gaza,” sepse ushtria izraelite përdor armët më vdekjeprurëse moderne kundër civilëve të pafajshëm.
Presidenti turk vlerësoi se Izraeli “ka humbur plotësisht kontrollin” pas sulmit ndaj Katarit më parë këtë muaj, që sipas tij është provë se kryeministri Benjamin Netanyahu “nuk ka ndërmend të kërkojë paqe apo t’i lirojë pengjet.”
Erdoğan shtoi se administrata izraelite, e fiksuar pas asaj që e quan “tokë e premtuar,” minon paqen rajonale dhe arritjet e përbashkëta të njerëzimit me politikën e saj ekspansioniste.
Ai theksoi gjithashtu se sulmet izraelite kanë shtypur të drejtat themelore njerëzore, të grave dhe fëmijëve, si dhe lirinë e shprehjes, protestës, barazinë dhe drejtësinë.
Ai përfundoi duke thënë se autorët e gjenocidit duhet të përgjigjen para ligjit ndërkombëtar, “gjë që pa dyshim do të ndodhë.”
Burimi: TRT Balkan
