Një përplasje e hapur diplomatike ndodhi të enjten në Ankara, gjatë vizitës së parë zyrtare të kancelarit gjerman Friedrich Merz në Turqi që prej marrjes së detyrës, ku ai u përball me kritika të drejtpërdrejta nga presidenti turk Rexhep Tajip Erdogan lidhur me qëndrimin e Gjermanisë ndaj luftës në Rripin e Gazës.
Në konferencën e përbashkët për shtyp, presidenti Erdogan akuzoi Gjermaninë për “mospërfillje ndaj gjenocidit dhe masakrave që Izraeli po kryen në Gaza”. Ai përdori tone të forta, duke kërkuar nga kancelari gjerman që të shihte realitetin e situatës humanitare në territorin palestinez.
“A nuk e sheh Gjermania gjenocidin e Izraelit në Gaza? Hamasi nuk ka bomba, nuk ka armë bërthamore, por Izraeli i ka të gjitha dhe i përdor për të goditur Gazën. Për shembull, me ato bomba goditi përsëri mbrëmë. A i shihni ju këto si Gjermani? A i ndiqni këto? Përveç bombardimeve ndaj Gazës, Izraeli gjithmonë ka synuar ta shtypë popullin e saj përmes urisë dhe gjenocidit”, deklaroi Erdogan.
Kancelari Merz, nga ana e tij, pranoi se disa veprime të Izraelit kanë qenë të dënueshme, por hodhi poshtë termin “gjenocid”, duke theksuar se kritika ndaj Izraelit nuk duhet të përdoret si pretekst për antisemitizëm. Ai gjithashtu nënvizoi se Gjermania ka pezulluar eksportet ushtarake drejt Izraelit këtë vit për shkak të përkeqësimit të situatës humanitare në Gaza.
“Do të kishte mjaftuar vetëm një vendim për të shmangur një numër të madh viktimash të panevojshme. Hamasi duhej t’i kishte liruar pengjet më herët dhe të dorëzonte armët. Megjithatë, ne shpresojmë se lufta po i afrohet fundit, me marrëveshjen e armëpushimit të ndërmjetësuar nga SHBA-ja dhe të mbështetur nga Turqia”, u shpreh Merz.
Erdogan, i njohur si një ndër kritikët më të ashpër të ofensivës izraelite në Gaza dhe si një ndër ndërmjetësit kryesorë në përpjekjet për armëpushim, reagoi menjëherë pas deklaratave të Merz. Ai theksoi se nuk mund të pajtohej me qëndrimin e kancelarit gjerman dhe se Turqia do të vazhdojë ta denoncojë hapur “politikën e shfarosjes ndaj palestinezëve”.
Presidenti turk theksoi gjithashtu se, pavarësisht dallimeve të forta në qëndrime, ai beson se Turqia dhe Gjermania mund të bashkëpunojnë për të përballuar krizën humanitare në Gaza, duke lehtësuar dërgimin e ndihmave për popullsinë civile.
