Partia Laburiste në Mbretërinë e Bashkuar po shqyrton mundësinë e përdorimit të kazermave ushtarake për strehimin e përkohshëm të azilkërkuesve, në përpjekje për të përballuar rritjen e fluksit të emigrantëve dhe pakënaqësitë e publikut për përdorimin e hoteleve. Vetëm të shtunën e kaluar, në brigjet britanike mbërritën rreth 1,000 emigrantë, duke rritur ndjeshëm presionin mbi sistemin e azilit. Sekretari i Mbrojtjes, John Healey, deklaroi për Sky News se qeveria është duke analizuar disa opsione, duke përfshirë përdorimin e bazave ushtarake dhe jo-ushtarake, me synim forcimin e besimit të publikut tek aftësia e shtetit për të kontrolluar kufijtë. Ai theksoi se masat janë pjesë e strategjisë së re për menaxhimin e emigracionit të paligjshëm.
Ky zhvillim vjen pas kritikave të ashpra për përdorimin e hoteleve si qendra strehimi dhe pas mbylljes së anijes Bibby Stockholm, ndërsa qeveria e mëparshme kishte braktisur planin e shumëdebatuar për transferimin e emigrantëve në Ruandë.
Në të njëjtën kohë, Zia Yusuf nga partia Reform UK ka propozuar ndërtimin e 15 deri në 25 qendrave paraburgimi me struktura modulare çeliku, të ngjashme me ato të përdorura në SHBA gjatë administratës Trump, duke i cilësuar si më efikase dhe dekurajuese ndaj kalimeve të paligjshme.
Ndryshimet e fundit në kabinetin e kryeministrit Sir Keir Starmer sollën gjithashtu emërimin e Shabana Mahmood si Sekretare e Brendshme, e cila tashmë ka në dorë menaxhimin e çështjeve të ndjeshme të imigracionit, duke zëvendësuar Yvette Cooper.
Pavarësisht një rënieje të përkohshme të mbërritjeve në fund të gushtit, shifrat për vitin 2025 kanë arritur në 29,003 emigrantë, niveli më i lartë ndonjëherë për këtë periudhë. Sipas Agjencisë Kombëtare të Krimit (NCA), janë arritur suksese të konsiderueshme në ndërprerjen e rrjeteve kriminale të trafikimit të njerëzve, por sfidat mbeten të mëdha.
Megjithatë, eksperienca e qeverisë konservatore, që përdori më parë bazat ushtarake për strehimin e azilkërkuesve, u shoqërua me kritika për kushtet e dobëta të jetesës dhe me protesta lokale, duke ngritur pikëpyetje mbi efektivitetin dhe pranueshmërinë e kësaj mase të re nga Laburistët.
