Miliarderi amerikan Elon Musk ka rikthyer vëmendjen tek kriza demografike që po përfshin Europën, duke ribotuar një postim në platformën X që flet për një “kolaps historik të lindjeve”. Sipas tij, rënia e lindshmërisë po bëhet një fenomen shqetësues që prek rëndë edhe vendet e rajonit tonë.
“Shumë vende kanë rënie të normave të lindjeve”, shkroi Musk, duke shpërndarë analizën e përdoruesit DogeDesigner, i cili paralajmëron se Evropa po përballet me një kolaps historik të lindjeve.
Miliarderi ka publikuar edhe statistikat për disa vende të cilat po shënojnë ulje drastike të lindshmërisë:
Finlanda ka humbur një të tretën e lindshmërisë që nga viti 2010.
Zvicra, Anglia, Skocia dhe Uellsi po përjetojnë nivelet më të ulëta historike të lindjeve.
Polonia raportohet në nivelin më të ulët të lindshmërisë në 200 vitet e fundit.
Greqia cilësohet si vendi me nivelin më të ulët të lindshmërisë në të gjithë Europën.
Spanja, Italia, Austria dhe Gjermania regjistrojnë normat më të ulëta të lindjeve në mbi 35 vite.
Musk ka paralajmëruar shpesh se rënia e popullsisë do të shndërrohet në një ndër sfidat më të mëdha të shoqërive moderne, duke nënvizuar se kriza demografike pritet të ketë pasoja të thella ekonomike, sociale dhe financiare në dekadat e ardhshme. Ndërsa kjo është hera e dytë që miliarderi amerikan rikthen vëmendjen te ky shqetësim për Europën.
