Më 5 shkurt 1995, policia merr një telefonatë anonime: "Ka një vajzë pa jetë në greminën e Tuvixeddu."
Tuvixeddu është emri i një kodre dhe i një nekropoli që ndodhet në zemër të qytetit Cagliari. Forcat e rendit gjejnë atje trupin e Manuela Murgia, 16 vjeçe, në këmbët e një shkëmbi 30 metra të lartë. Vajza ishte zhdukur që një ditë më parë.
Një e njohur pretendon se e kishte parë më 4 shkurt 1995, pak pas orës 12:00, teksa hipte në një makinë blu metalike, e drejtuar nga një burrë. Ky është kontakti i fundit para se trupi i pajetë të gjendej ditën tjetër.
Merret në pyetje Enrico Astero, i dashuri i Manuelës, 8 vite më i madh se ajo. Ai pohon se nuk e kishte parë vajzën prej rreth dhjetë ditësh, sepse kishin ndërprerë marrëdhënien. Nuk bëhen hetime të mëtejshme ndaj tij dhe nuk identifikohen pista të tjera. Për hetuesit, shkaku mbetet i paqartë dhe merren parasysh disa hipoteza: vetëvrasje, vdekje aksidentale ose vrasje me fshehje trupi. Në mungesë të elementëve të rinj, në vitin 1997 Prokuroria vendos ta mbyllë çështjen si vetëvrasje.
Por diçka nuk shkon.
Hipoteza është që Manuela të jetë hedhur nga shkëmbi. Por rrobat e saj janë të paprekura, ndonëse në shpinë ka prerje. Fytyra nuk ka plagë, edhe pse trupi u gjet me fytyrë nga toka, dhe në qafë ka shenja të shumta. Nuk ka as fraktura të rënda. Si është e mundur kjo pas një rënieje prej 30 metrash? Familja Murgia nuk e ka pranuar kurrë versionin e vetëvrasjes.
Në vitin 2023, familja Murgia, me ndihmën e avokatëve të saj, arrin të marrë në dorë dosjen e plotë të çështjes së Manuelës. Një ekspertizë e re ngre dyshimin se Manuela është përdhunuar, më pas përplasur nga një makinë dhe në fund trupi i saj është tërhequr drejt greminës së Tuvixeddu-t. Kjo rindërtim i ri sjell sërish vëmendjen mbi të dashurin e atëhershëm të Manuelës, Enrico Astero, sot 54 vjeç. Në maj 2025, Astero u regjistrua zyrtarisht si i dyshuar për vrasje me dashje. Ndërkohë, hipoteza e përdhunimit para vrasjes mbështetet nga një zhvillim vendimtar: gjetja e rrobave të Manuelës. Analizat kanë zbuluar shumë gjurmë, në veçanti gjurmë ADN-je mashkullore në të brendshmet e saj.
Hetimet janë ende në vazhdim. Hapi i radhës është të verifikohet nëse ADN-ja mashkullore e gjetur në rroba i përket ose jo Enrico Astero-s. Familja shpreson se, pas 30 vitesh, më në fund do të zbardhet e vërteta për vdekjen e Manuela Murgias./Fanpage.it
