Situata në Venezuelë ka nxitur reagime të menjëhershme ndërkombëtare pas njoftimit të Shteteve të Bashkuara se presidenti Nicolas Maduro është arrestuar dhe është dërguar në SHBA për t’u përballur me akuza penale. Zhvillimet kanë shkaktuar shqetësim në kryeqytetet evropiane dhe përplasje të forta diplomatike me Moskën.
Ministria e Jashtme e Gjermanisë deklaroi të shtunën se po e ndjek situatën me “shqetësim të madh”, duke konfirmuar se është në kontakt të vazhdueshëm me ambasadën gjermane në Karakas. Sipas një komunikimi të brendshëm, një ekip krize pritet të mblidhet për të diskutuar zhvillimet dhe hapat e mëtejshëm.
Edhe Italia ka reaguar zyrtarisht. Ministri i Jashtëm Antonio Tajani tha se Roma dhe përfaqësitë diplomatike italiane në Venezuelë po monitorojnë nga afër situatën, me vëmendje të veçantë ndaj komunitetit italian në vend. Sipas ambasadorit italian në Karakas, rreth 160 mijë shtetas italianë jetojnë aktualisht në Venezuelë, shumica me shtetësi të dyfishtë. Tajani bëri të ditur se kryeministrja Giorgia Meloni po informohet në mënyrë të vazhdueshme dhe se njësia e krizës në Ministrinë e Jashtme është aktive.
Nga ana tjetër, Rusia e ka dënuar ashpër veprimin e SHBA-së, duke e cilësuar si një “akt agresioni të armatosur” ndaj Venezuelës. Ministria e Jashtme ruse u shpreh se është thellësisht e shqetësuar dhe bëri thirrje për shmangien e përshkallëzimit dhe për zgjidhje përmes dialogut.
Spanja ka mbajtur një qëndrim më diplomatik, duke kërkuar ulje tensionesh, përmbajtje dhe respektim të së drejtës ndërkombëtare. Madridi u ofrua gjithashtu si ndërmjetës për të ndihmuar në gjetjen e një zgjidhjeje paqësore për krizën në Venezuelë.
Në Shtetet e Bashkuara, një senator republikan deklaroi se Sekretari i Shtetit Marco Rubio e ka informuar se Maduro ndodhet në paraburgim amerikan dhe do të përballet me drejtësinë për akuza kriminale, ndërsa administrata Trump ka theksuar se ai do të “përballet më në fund me drejtësinë”. Opozita venezueliane, e drejtuar nga fituesja e Çmimit Nobel për Paqen Maria Corina Machado, ka deklaruar se për momentin nuk ka një koment zyrtar për ngjarjet.
Ndërkohë, situata në Karakas mbetet e tensionuar, me raportime për ndërprerje të energjisë elektrike dhe tym pranë objekteve ushtarake, ndërsa zhvillimet në Venezuelë po ndiqen me vëmendje të lartë nga komuniteti ndërkombëtar.
