Sipas një raporti të The Mail on Sunday, këngëtarja britanike me famë botërore, Dua Lipa, ka pushuar agjentin e saj pasi ky i fundit kishte nënshkruar një letër ku kërkohej që grupi pro-palestinez Kneecap të përjashtohej nga festivali i Glastonbury-t.
Letra ishte dërguar privatisht themeluesit të festivalit, Michael Eavis, përpara zhvillimit të Glastonbury në korrik, dhe ishte firmosur nga disa profesionistë dhe artistë të industrisë së muzikës. Megjithatë, letra u bë publike dhe u kritikua ashpër nga të tjerë në botën e muzikës. Grupi Kneecap gjithsesi performoi në skenë.
Ndër nënshkruesit e letrës ishte edhe David Levy, agjenti i Dua Lipës nga agjencia e njohur e talenteve WME. Sipas burimeve të industrisë muzikore të cituara nga The Mail on Sunday, Dua Lipa mori vendimin për ta larguar atë për shkak të qëndrimeve të tyre të papërputhshme lidhur me çështjen palestineze.
"Ajo e sheh atë si një mbështetës të luftës së Izraelit në Gaza dhe të trajtimit çnjerëzor ndaj palestinezëve, gjë që u bë shumë e qartë përmes letrës që ai nënshkroi dhe ia dërgoi Michael Eavis-it," tha një burim anonim për The Mail.
Grupi Kneecap ka qenë në qendër të polemikave pas akuzave për mbështetje ndaj Hezbollah dhe Hamas, akuza që grupi i mohon kategorikisht.
Në maj, Liam Óg Ó hAnnaidh, anëtar i grupit që performon me emrin artistik Mo Chara, u akuzua nën ligjin britanik për terrorizëm për shkak se kishte shfaqur një flamur të Hezbollah-ut gjatë një koncerti në nëntor të vitit të kaluar. Seanca e radhës për çështjen e tij është caktuar në fund të këtij muaji.
Javën e kaluar, Kneecap kritikoi ashpër qeverinë kanadeze që ndaloi hyrjen e tyre në vend, duke i akuzuar për nxitje të dhunës politike dhe terrorizmit përmes mbështetjes së pretenduar ndaj Hamas dhe Hezbollah. Në reagimin e tyre, grupi e quajti deklaratën e zyrtarit kanadez Vince Gasparro "plotësisht të pavërtetë dhe keqdashëse", duke paralajmëruar edhe masa ligjore kundër tij.
Ndërkohë, gjithnjë e më shumë artistë pro-palestinezë po i kërkojnë industrisë muzikore të mbajë qëndrim më të fortë. Të premten, më shumë se 400 muzikantë dhe kompani diskografike nënshkruan nismën “No Music for Genocide” (Asnjë muzikë për gjenocid), duke tërhequr muzikën e tyre nga Izraeli si reagim ndaj luftës në Gaza dhe “spastrimit etnik në Bregun Perëndimor të pushtuar”.
“Kjo është një hap konkret për të nderuar kërkesat e popullit palestinez që të izolohet dhe delegjitimohet Izraeli, teksa vret pa pasoja në arenën ndërkombëtare,” thuhej në deklaratën e nismës.
Al Jazeera ka kontaktuar agjencinë WME për një koment, por deri më tani nuk ka marrë përgjigje.
