Presidenti amerikan Donald Trump deklaroi në një intervistë ekskluzive për The Telegraph se është “shumë i zhgënjyer” nga kryeministri britanik Keir Starmer, pasi ky i fundit fillimisht refuzoi që forcat amerikane të përdornin bazën ushtarake në Diego Garcia për operacione kundër Iranit.
Trump tha se një refuzim i tillë “ndoshta nuk ka ndodhur kurrë më parë midis vendeve tona”, duke shtuar se Starmer dukej i shqetësuar për ligjshmërinë e veprimit. Sipas tij, baza duhej të ishte vënë menjëherë në dispozicion të SHBA-ve.
Fillimisht, Britania kishte mohuar lejen për përdorimin e Diego Garcia dhe të bazës RAF Fairford, duke iu referuar ligjit ndërkombëtar. Megjithatë, të dielën vonë, Starmer u tërhoq pjesërisht, duke lejuar përdorimin e Diego Garcia për “qëllime specifike dhe të kufizuara mbrojtëse”.
Mosmarrëveshja ndikoi edhe në çështjen e Ishujve Chagos. Trump hoqi mbështetjen për planin e Londrës për t’ia kaluar sovranitetin e Ishujt Chagos Mauricisë, duke kërkuar që baza ushtarake të mbetej funksionale për SHBA-të me qira.
Diego Garcia, në pronësi të Britanisë, ndodhet rreth 2,400 milje nga bregu jugor i Iranit. Pozicioni i saj e vendos jashtë rrezes së raketave balistike iraniane, por brenda diapazonit operacional të bombarduesve amerikanë B-2, çka e bën strategjikisht të rëndësishme për operacionet në rajon.
Sipas raportimit të The Telegraph, Pentagoni kërkoi përdorimin e bazave britanike për të goditur kapacitetet raketore iraniane, në një moment kur Irani po lëshonte raketa dhe dronë drejt objektivave në Izrael dhe vendet e Gjirit Persik.
Ndërkohë, Britania po përballet me një situatë emergjente në rajon. Të paktën 94 mijë shtetas britanikë në Emiratet e Bashkuara Arabe dhe vende të tjera të Gjirit kanë regjistruar të dhënat pranë Ministrisë së Jashtme për një evakuim të mundshëm, në atë që mund të jetë një nga operacionet më të mëdha të këtij lloji që nga Lufta e Dytë Botërore.
