Situata në ngushticën e Hormuzit është një sfidë e madhe për industrinë globale të transportit detar. Kështu është shprehur sekretari i Përgjithshëm i Organizatës Ndërkombëtare Detare, Arsenio Dominguez. Ai thotë se 20 mijë marinarë dhe 2 mijë anijë kanë mbetur të bllokuar.
'Rreth 20 mijë marinarë janë bllokuar në Ngushticën e Hormuzit dhe afro 2 mijë anije nuk mund të lundrojnë. Sa më gjatë të qëndrojnë këto anije aty, aq më shumë ekuipazhet vuajnë nga stresi, presioni psikologjik dhe lodhja, si dhe nga mungesa e furnizimeve të nevojshme për funksionimin e anijeve'.
Kreu i IMO-s theksoi se kompanitë e sigurimeve po refuzojnë të mbulojnë kostot apo dëmet, duke anuluar kontratat ose duke vendosur prime shumë të larta sigurimi.
Aktualisht, një krizë humanitare në këto anije po shmanget falë ndihmës që ofrojnë vendet përreth ngushticës, ndërsa IMO po bën thirrje për krijimin e një korridori humanitar që do t’u lejojë anijeve të dalin nga zona.
