Një aksident tragjik rrugor në Afganistanin perëndimor ka lënë të vdekur 73 persona, përfshirë 17 fëmijë, shumica prej të cilëve ishin migrantë afganë të deportuar nga Irani. Lajmi është konfirmuar nga një zyrtar i talebanëve për BBC Pashto.
Sipas Ahmadullah Mottaqi, drejtor për informacionin dhe kulturën në Herat, autobusi që po udhëtonte drejt Kabulit u përfshi nga flakët të martën në mbrëmje, pasi u përplas me një kamion dhe një motor në provincën e Heratit. Ai shtoi se të gjithë pasagjerët në autobus humbën jetën, si dhe dy persona nga mjetet e tjera të përfshira në aksident.
Zëdhënësi i guvernatorit provincial, Mohammad Yousuf Saeedi, tha për AFP se “të gjithë pasagjerët ishin migrantë që ishin ngjitur në mjet në Islam Qala”, një qytet pranë kufirit mes Afganistanit dhe Iranit.
Policia e Heratit bëri me dije se aksidenti ndodhi për shkak të “shpejtësisë së lartë dhe pakujdesisë” së shoferit të autobusit. Aksidentet rrugore janë të zakonshme në Afganistan për shkak të rrugëve të dëmtuara nga dekada konfliktesh dhe mungesës së zbatimit të rregullave të qarkullimit rrugor.
Që nga vitet 1970, miliona afganë kanë ikur drejt Iranit dhe Pakistanit, sidomos gjatë pushtimit sovjetik në vitin 1979 dhe pas rikthimit të talebanëve në pushtet në vitin 2021. Kjo ka shtuar ndjeshëm ndjenjën anti-afgane në Iran, ku refugjatët përballen me diskriminim sistematik.
Irani kishte vendosur një afat deri në korrik për largimin vullnetar të afganëve pa dokumente, por pas një konflikti të shkurtër me Izraelin në qershor, autoritetet iraniane nisën deportimin me forcë të qindra mijëra afganëve, duke u justifikuar me shqetësime për sigurinë kombëtare. Kritikët thonë se Teherani po kërkon fajtorë për dështimet e veta të sigurisë ndaj sulmeve izraelite.
Sipas Agjencisë së OKB-së për Refugjatët (UNHCR), mbi 1.5 milionë afganë janë larguar nga Irani që nga janari – shumë prej tyre ishin vendosur atje prej brezash. Ekspertët paralajmërojnë se Afganistani nuk ka kapacitete për të përballuar këtë valë të re kthimesh të detyruara, ndërkohë që vendi tashmë është nën trysni nga kthimet masive nga Pakistani. “Rikthimi i kaq shumë personave po krijon një barrë shtesë mbi burimet tashmë të tejzgjatura, dhe kjo valë e re refugjatësh vjen në një kohë kur Afganistani po përjeton pasojat e dhimbshme të ndërprerjes së ndihmave,” tha Arshad Malik, drejtori i Save the Children për Afganistanin.
