Detaje të reja kanë dalë në dritë lidhur me operacionin e forcave speciale amerikane për arrestimin e Presidentit të Venezuelës, Nicolás Maduro, dhe bashkëshortes së tij, Cilia Flores, në rezidencën presidenciale në Karakas.
Sipas raportimeve të CNN, gjatë ndërhyrjes së forcave amerikane, çifti presidencial tentoi t’i shpëtonte arrestimit duke u fshehur brenda kompleksit rezidencial. Maduro dhe Flores u përpoqën të strehoheshin pas një dere të rëndë çeliku, por për shkak se korniza e saj ishte më e ulët, ata përplasën kokën, duke pësuar lëndime.
Forcat speciale të njësisë elitare “Delta Force” i neutralizuan menjëherë dhe, sipas burimeve amerikane, u dhanë ndihmën e parë pas nxjerrjes së tyre nga godina. Cilia Flores u paraqit të hënën në gjykatë me fasha në kokë, ndërsa avokati i saj deklaroi se ajo ka marrë “plagosje të konsiderueshme” dhe mund të ketë edhe thyerje ose mavijosje të rënda në brinjë, duke kërkuar ekzaminim të plotë mjekësor dhe rreze X.
Operacioni për arrestimin e Maduros zgjati dy ditë dhe u shoqërua me luftime të ashpra me një forcë kubane të reagimit të shpejtë, e stacionuar pranë kompleksit presidencial. Zyrtarët amerikanë konfirmuan se disa marinsa u plagosën nga plumba dhe copëza predhash, por theksuan se asnjë prej plagëve nuk ishte kërcënuese për jetën.
Rreth 200 efektivë amerikanë morën pjesë në aksion. Sekretari amerikan i Mbrojtjes, Pete Hegseth, e cilësoi operacionin si “të mirëorganizuar”, duke theksuar se ai kishte për qëllim zbatimin e sanksioneve dhe ndjekjen e akuzave për trafik droge dhe armësh ndaj Maduros.
Administrata amerikane këmbëngul se arrestimi i presidentit venezuelian nuk ishte një operacion për ndryshim regjimi. Megjithatë, pas largimit të Maduros, drejtimin e vendit e ka marrë zëvendëspresidentja Delcy Rodríguez, të cilën Uashingtoni e konsideron më pragmatike dhe më të hapur për bashkëpunim, veçanërisht në sektorin e naftës.
Burime pranë administratës amerikane bëjnë me dije se vendimi për të punuar me Rodríguez është mbështetur në një analizë të klasifikuar të CIA-s mbi pasojat afatshkurtra të arrestimit të Maduros dhe ndikimin e tij në stabilitetin e Venezuelës.
Sekretari i Shtetit, Marco Rubio, është caktuar si pika kryesore e kontaktit me qeverinë e re. Presidenti Donald Trump ka deklaruar se marrëdhënia mes Rubios dhe Rodríguez është “shumë e fortë”, ndërsa Uashingtoni synon të përdorë presionin ushtarak dhe kontrollin mbi naftën e sanksionuar si levë për të rihapur Venezuelën ndaj kompanive amerikane dhe për të rikthyer ndikimin në infrastrukturën energjetike të vendit.
